കരയാതെ കരയേ

ഓരോരോ തിരയായി വന്നുവന്ന്

നുരയുള്ള തലോടലില്‍ അലിഞ്ഞലിഞ്ഞ്

അടിവേരുനിന്ന നിലമാകെ പോയല്ലോ

അടിതൊട്ട് മുടിവരെ

ഉടലാകെ ഉലഞ്ഞല്ലോ

പത്രക്കാരെ

പടം പിടിക്കുന്നോരെ

ഓടിവരണെ

ഞാനിതാ

കടപുഴകി വീഴുന്നേ

കടല്‍ തഴുകി വീഴ്ത്തുന്നേ

.....

സിനിമാനടിയുടെ പിന്‍ഭാഗത്ത്

വിശാലമായ എസി ഷോറൂം

എന്ന പരസ്യവാചകം കണ്ട്

തിയേറ്ററില്‍

തലതല്ലിച്ചിരിച്ചവനാണു ഞാന്‍

ഇന്നിതാ

പുലര്‍ച്ചയ്ക്ക്

കൊടുംതണുപ്പത്ത്

കടത്തിണ്ണയില്‍

തൂക്കിവില്‍പ്പന എന്നെഴുതിയ

കീറത്തുണിയും പുതച്ച്

കുരച്ചുകിടക്കുകയാണ്

എല്ലും തോലും മാത്രമായ മനുഷ്യരൂപം