ഉണര്‍വുകള്‍

ഉയര്‍ന്നുപൊങ്ങുന്ന ഒരു ബലൂണിനെ നോക്കി
നമുക്ക് സ്വാതന്ത്ര്യദാഹി എന്ന് വിളിക്കാം
അതിന്‌ ഉറച്ചിരിക്കാനുള്ള
ത്രാണിയില്ലെന്നും പറയാം

ഉയര്‍ന്നുപൊങ്ങുന്നത്‌ തെറ്റല്ല
ഉറച്ചിരിക്കുന്നതും

അത്‌
അതതിന്റെ
പ്രകൃതം

വൈകുന്നേരത്തെ നടത്തം

വൈകുന്നേരം നടക്കാനിറങ്ങുമ്പോള്‍
പൊണ്ടാട്ടി
പിന്നില്നിന്ന് വിളിക്കും
ഉള്ളി
ഉരുളക്കിഴങ്ങ്
ഉണക്കമീന്‍ ...

വൈകുന്നേരത്തെ നടത്തം
തിരിച്ച് വീട്ടിലെത്തുമ്പോള്‍
നിരോധിച്ചിട്ടും നിലയ്ക്കാത്ത
അമ്പതു മൈക്രോണില്‍ കുറഞ്ഞ കവറില്‍
ഒന്നിനൊന്ന്
വിലകൂടുന്ന
ഉള്ളിക്കും
ഉണക്കമീനിനുമൊപ്പം

പത്തുരൂപയുടെ സ്റ്റാമ്പുപതിച്ച്
പ്രസാധകനയച്ചുകൊടുത്താല്‍
പത്തുപൈസപോലും തിരിച്ചുകിട്ടാത്ത
പഞ്ഞം പിടിച്ച കവിത

അ വ ധാ ന ത

അ
വ
ധാ
ന
ത
ഒരു വാക്കല്ല
അതിന്റെ അര്‍ഥമല്ല
നൂറുനൂറു വിവക്ഷകളല്ല

അ
വ
ധാ
ന
ത
കവിതയാണ്‌

വേഗം വേഗം എന്ന്
വിറളിപിടിക്കുന്നവന്‌
മനസ്സിലാവില്ല
അ
വ
ധാ
ന
ത
എന്ന
കവിത

അവനറിയുന്നുണ്ടാകുമോ
വേഗത്തിന്റെ കവിത...?

വെളിച്ചം

വെളിച്ചം വീണതിന്റെ
ഉല്ലാസം
പുരപ്പുറത്തുനിന്ന്
ഉദ്ഘോഷിക്കുന്നു
പൂവന്‍കോഴി

വെളിവുപോണതിന്റെ
ഉന്മാദം
പൂരപ്പറമ്പില്‍ കിടന്ന്
ആഘോഷിക്കുന്നവരുടെ
നാട്ടില്‍