ഇലകളിലേക്ക് തിരികെയെത്തുന്ന വേരുകള്‍

2011-12-23T21:35:00.000-08:00

apÃs¸cnbmÀ

alm\Kc¯nÂ

\mepwIqSnb IhebnÂ

{Sm^nIv sFe³Unse

KmÔn{]Xnabv¡v ap¶nÂ\n¶v

Hcp sXcphp]«n

XebnÂ Nm¡psI«pambn \S¶pt]mIp¶

Xangs\t\m¡n Ipcbv¡p¶p

IpcbpsS ImcWadnbWw Xang\v

AbmÄ

\SptdmUnÂ

Nm¡psI«v Xmsgbn«v

]«n¡pt\tc \S¡p¶p

]«n

Ipc¨v Ipc¨v

Ipd¨v Ipc¨v

Ipc ad¶v

KmÔn¡p]n¶nsemfn¡p¶p

tea4travel

2011-08-28T00:55:00.000-07:00

പുതിയ ട്രാവല്‍ ബ്ലോഗ് ലിങ്ക് ചുവടെ

സാംസ്കാരിക നായ

2011-08-28T00:47:00.000-07:00

കൂടുതുറന്നാലുടനെ
കുതിച്ചുപായാറുള്ള
വളര്‍ത്തുനായക്ക്
ഒരെല്ലിന്‍ കഷണമിട്ടുകൊടുത്തു ഇന്ന്

കാളയുടേയോ (കാളനുമാവാം )
കോഴിയുടെയോ
എല്ലല്ല
കെന്നല്‍ കടയില്നിന്ന്
കവറില്‍ വാങ്ങിയ
ഒരു പ്ലാസ്റ്റിക് എല്ല്

കാലത്ത്
കോഴി ( മൂന്നുവട്ടം ) കൂവുന്നതുവരെ
കുരയോ കുറുകലോ കൂത്താട്ടമോ ഇല്ലാതെ
കടിച്ചതില്‍ തന്നെ കടിച്ചുകിടന്നു അത്‌

എന്റെ രാഷ്ട്രീയം

2011-08-19T06:36:00.000-07:00

ഈ കവിതക്കോ
ഇനി എഴുതാന്‍ പോകുന്ന കവിതകള്‍ക്കോ
ഞാഞ്ഞൂലുകള്‍ തലപൊക്കുമ്പോള്‍ എന്ന്
തലക്കെട്ടിടില്ല,
പരാമര്‍ശിക്കുകയുമില്ല

മനുഷ്യന്‍ അല്പനല്ലാത്തതുകൊണ്ടല്ല
അതിന്‌
ഞാഞ്ഞൂലുകള്‍
വിലകൊടുക്കേണ്ടതില്ലാത്തതുകൊണ്ടാണ്‌

മഴപെയ്യുന്നത്‌ ...

2011-08-11T17:16:00.000-07:00

മഴപെയ്യുന്നത്‌ പൊറുക്കാം
മരം പെയ്യുന്നതോ..?

വേരുകളിലേക്ക് തിരികെയെത്തുന്ന ഇലകള്‍ ...

2011-07-25T23:36:00.000-07:00

ഓരോ കാല്‍ പറിക്കുമ്പൊഴും
വേരുപൊട്ടുന്ന
ഒച്ച കേള്ക്കുന്നു

ഓരോ കാല്‍ പതിയുമ്പൊഴും
നനവുള്ള
മണ്ണ്‌ പരതുന്നു

ആറടി താഴ്ചക്കുതാഴെ
പാതാളത്തോളമെത്തുന്ന വേരുകള്‍

ആറടി ഉയരത്തിനുമുയരെ
ആകാശത്തോളമെത്തുന്ന വേരുകള്‍

എനിക്കുമടുത്തു ആഴത്തിലാഴത്തിലീ
ആരായലുകള്‍
ആളാകലുകള്‍

എനിക്കുമടുത്തു
നിന്നനില്പില്‍ നിന്നുള്ള കാഴ്ചകള്‍
നിന്നിടം കുഴിക്കുന്ന വിദ്യകള്‍

ഇനി വേരുകള്‍ വേണ്ട
ഇലയായാല്‍ മതി

വെയിലോ മഞ്ഞോ മഴയോ
എത്രവേണമെങ്കിലും പെയ്തോട്ടെ
ഋതുക്കള്‍ മാറുന്നതിനനുസരിച്ച്
ഏതുടുപ്പുമണിഞ്ഞോട്ടേ
ഒരു കാറ്റുവന്ന് ചുറ്റിപ്പിടിച്ച്
ഏതിരുട്ടിലേക്കും
കൂട്ടട്ടേ

ഒടുവിലൊടുവില്‍
അലിഞ്ഞലിഞ്ഞവസാനമെത്തുമ്പോള്‍
നിറങ്ങളും നിധാനങ്ങളും നഷ്ടമാകുമ്പോള്‍
കൈനോട്ടക്കാരന്റെ കണ്ണാടിയിലെന്നപോലെ
തെളിഞ്ഞുവരുമോ
എന്റെ ഇലകള്ക്കുള്ളിലെ
വേരുകള്‍

ഉണര്‍വുകള്‍

2011-06-30T10:10:00.000-07:00

ഉയര്‍ന്നുപൊങ്ങുന്ന ഒരു ബലൂണിനെ നോക്കി
നമുക്ക് സ്വാതന്ത്ര്യദാഹി എന്ന് വിളിക്കാം
അതിന്‌ ഉറച്ചിരിക്കാനുള്ള
ത്രാണിയില്ലെന്നും പറയാം

ഉയര്‍ന്നുപൊങ്ങുന്നത്‌ തെറ്റല്ല
ഉറച്ചിരിക്കുന്നതും

അത്‌
അതതിന്റെ
പ്രകൃതം

നാടുവിട്ടവന്റെ വേവലാതികള്‍

2011-05-17T07:29:00.000-07:00

പണ്ട്
ഇവിടം കാടായിരുന്നു
കാടുതീരുന്നിടം
പുഴയായിരുന്നു

ഇവിടെ നിന്നു നോക്കിയാല്‍
പുഴ കാണുമായിരുന്നില്ല
ഒഴുകുന്ന ഇരമ്പം കേള്‍ക്കാം

ഇന്ന്
വരിവരിയായി
വളര്‍ന്നുനില്‍ക്കുന്ന
റബര്‍ മരങ്ങള്‍ക്കിടയിലൂടെ
പുഴ കാണാം
പുഴ ഒഴുകിയിരുന്നിടത്തെ
വഴി കാണാം

അവിടേക്കു പോകേണ്ടായെന്ന്
കൂട്ടുകാരന്‍ പറഞ്ഞു
തേനീച്ചകൃഷിക്കുവന്ന
തമിഴന്‍മാര്‍
തൂറുന്നതവിടെയാണ്‌

പ്രത്യക്ഷത്തില്‍
ഈ കവിത
റബറിനും തമിഴനും എതിരാണ്‌

എന്റെ അപ്പന്‍
ഒരു റബറുവെട്ടുകാരനും കൂടിയായിരുന്നു
പാലെടുത്ത് ഒറയൊഴിച്ചിട്ടാണ്‌
ഞാന്‍ സ്കൂളില്‍പൊയ്ക്കൊണ്ടിരുന്നത്‌
[ചാക്കോമാഷ്ടെ കണക്കുക്ലാസ്സ്
രോമങ്ങള്‍ക്കിടയിലെ ഒട്ടിയ പാല്‍
പൊളിച്ചുകളയാനുള്ളതായിരുന്നു]

നമ്മുടെ നാട്ടില്‍വന്ന്
തേനീച്ചകൃഷിചെയ്യുന്ന
തമിഴന്മാരോട്
എനിക്ക് ബഹുമാനമേയുള്ളൂ

പിന്നെ ഞാന്‍
കേള്‍ക്കാതെ പോയ
ഒരിരമ്പത്തെ
ഓര്‍മിച്ചുവെന്നേയുള്ളൂ

വൈകുന്നേരത്തെ നടത്തം

2011-01-12T06:17:00.000-08:00

വൈകുന്നേരം നടക്കാനിറങ്ങുമ്പോള്‍
പൊണ്ടാട്ടി
പിന്നില്നിന്ന് വിളിക്കും
ഉള്ളി
ഉരുളക്കിഴങ്ങ്
ഉണക്കമീന്‍ ...

വൈകുന്നേരത്തെ നടത്തം
തിരിച്ച് വീട്ടിലെത്തുമ്പോള്‍
നിരോധിച്ചിട്ടും നിലയ്ക്കാത്ത
അമ്പതു മൈക്രോണില്‍ കുറഞ്ഞ കവറില്‍
ഒന്നിനൊന്ന്
വിലകൂടുന്ന
ഉള്ളിക്കും
ഉണക്കമീനിനുമൊപ്പം

പത്തുരൂപയുടെ സ്റ്റാമ്പുപതിച്ച്
പ്രസാധകനയച്ചുകൊടുത്താല്‍
പത്തുപൈസപോലും തിരിച്ചുകിട്ടാത്ത
പഞ്ഞം പിടിച്ച കവിത

രൂപഭദ്രതാവാദം

2011-01-08T08:45:00.000-08:00

പത്തിരുപത്തഞ്ചു വയസ്സുവരെ
ഒരു പെണ്ണിന്റെ
മൂടും മുലയുമല്ലാതെ
മറ്റൊന്നും കണ്ടിട്ടില്ല

സുന്ദരിയാണോയെന്നറിയാന്‍
മുഖത്തേക്കൊന്നു
നോക്കില്ലെന്നല്ല

പിന്നീടെപ്പെഴോ ആണ്‌
അവളുടെ
വളവുകളില്‍
ശ്രദ്ധിച്ചുതുടങ്ങിയത്‌

അപ്പഴെപ്പഴോ ആണ്‌
ഞാനൊരു രൂപഭദ്രതാവാദിയായി തീര്‍ന്നത്‌
'വിവരവും വിദ്യാഭ്യാസ'വും ഉണ്ടായാല്‍ പോരാ എന്ന്
കാര്‍ന്നോമ്മാര്‍ പറയുന്നതില്‍
കാര്യമുണ്ടെന്ന് മനസ്സിലായത്‌

അ വ ധാ ന ത

2011-01-04T04:44:00.000-08:00

അ
വ
ധാ
ന
ത
ഒരു വാക്കല്ല
അതിന്റെ അര്‍ഥമല്ല
നൂറുനൂറു വിവക്ഷകളല്ല

അ
വ
ധാ
ന
ത
കവിതയാണ്‌

വേഗം വേഗം എന്ന്
വിറളിപിടിക്കുന്നവന്‌
മനസ്സിലാവില്ല
അ
വ
ധാ
ന
ത
എന്ന
കവിത

അവനറിയുന്നുണ്ടാകുമോ
വേഗത്തിന്റെ കവിത...?

രണ്ടു മനുഷ്യരുടെ ഏകാന്തത

2011-01-02T05:39:00.000-08:00

കാല്പനികമായൊരു ദൃശ്യഭംഗിയെങ്കിലുമുണ്ട്
ഒരു മനുഷ്യന്റെ ഏകാന്തതയ്ക്ക്
ആത്മധൈര്യമായി അത് ആഘോഷിക്കപ്പെട്ടേക്കാം

അങ്ങനെയല്ലാ രണ്ടു മനുഷ്യരുടെ ഏകാന്തത

അവനവനല്ലാതെ ആരറിയും
അതിന്റെ അലോസരപ്പെടുത്തുന്ന ആഴം

പുതുവത്സര പ്രതിജ്ഞ

2010-12-31T08:47:00.000-08:00

കടന്നുപോയ പെണ്ണിനെ
പിന്തിരിഞ്ഞുനോക്കില്ല

അവളെത്ര
പിന്നഴകിയായിരുന്നാലും

കവിതയുടെ വഴികള്‍ വിചിത്രം തന്നെ എന്ന് തെളിയിക്കുന്ന വിധം

2010-12-05T05:21:00.000-08:00

ഒരു കവിത എഴുതണമെന്ന് കുറേക്കാലമായി വിചാരിക്കുന്നു
ആരാധകര്‍ നിരന്തരം വിളിച്ച് ബുദ്ധിമുട്ടിച്ചുകൊണ്ടേയിരിക്കുന്നു

കവിത വന്ന വഴികളെക്കുറിച്ചൊക്കെ ആലോചിച്ചുനോക്കി

മുടിയിഴകളില്‍ കുടുങ്ങിക്കിടന്ന മണ്ണിരയെ കണ്ടപ്പോഴാണ്‌
ഒരു മണ്ണിര നൂറുറുമ്പുകള്‍ ഞാന്‍ എന്ന കവിത തോന്നിയത്‌
നമ്മുടെ കാലത്തെ ആദരണീയനായ എഴുത്തുകാരന്‍ എന്ന്
ഒരു ലേഖനത്തില്‍ വായിച്ചപ്പോഴാണ്‌
പ്രസ്തുത കവിത പൊട്ടിപ്പുറപ്പെട്ടത്‌
മഞ്ഞുതുള്ളിയുടെ ഫോട്ടോ എടുത്തുകൊണ്ടിരുന്നപ്പോഴാണ്‌
ഒറ്റ സ്നാപ്പ് എന്ന കവിത
മനോമുകുരത്തില്‍ അങ്കുരിച്ചത്‌

മണ്ണിരയെ അന്വേഷിച്ചിറങ്ങി
പുസ്തകം വായിച്ചു നോക്കി
പല പല സ്നാപ്പുകളെടുത്തു

ഒരു രക്ഷയുമില്ല
കവിതയുടെ വഴികള്‍ വിചിത്രം തന്നെ എന്ന് ഉപസംഹരിക്കാമെന്നു തോന്നി

അതിരിക്കട്ടെ
എപ്പോഴാണ്‌
ഇങ്ങനെ ഒന്ന് ...?

തൂറാനിരുന്നപ്പോഴാണ്‌
അങ്ങനെ ഒന്ന് !!

ഇപ്പോള്‍ മനസ്സിലായില്ലേ
കവിതയുടെ വഴികള്‍ വിചിത്രം തന്നെ

ഇതില്‍ അതിശയോക്തി തോന്നുന്നവര്‍
ഒരു വട്ടംകൂടി കവിത വായിച്ച്
അതിശയോക്തി ദൂരീകരിക്കേണ്ടതാണ്‌
വായിക്കുന്നവര്‍ക്കുതോന്നുന്ന അതിശയോക്തികളുടെ കാര്യത്തില്‍
കവിക്ക് യാതൊരു ഉത്തരവാദിത്വവും ഉണ്ടായിരിക്കുന്നതല്ല

ഒരു മണ്ണിര, നൂറുറുമ്പുകള്‍, ഞാന്‍ ...

2010-11-30T20:50:00.000-08:00

മുറ്റത്ത്
മുടിയിഴകളില്‍
കുടുങ്ങിക്കിടക്കുന്നു
ഒരു മണ്ണിര

മണ്ണിരയില്‍
കുടുങ്ങിക്കിടക്കുന്നു
നൂറുറുമ്പുകള്‍

നൂറുറുമ്പുകളില്‍
കുടുങ്ങിക്കിടക്കുന്നു
കുറേനേരമായി
ഞാന്‍

അതൊരു
പെണ്ണിന്റെ
മുടിയായിരിക്കണം
മുടി നീണ്ട
ഒരാണും
അടുത്തൊന്നും
ഇതുവഴി വന്നിട്ടില്ല

ഒരു പെണ്ണിന്റെ
മുടിയിഴകളില്‍
കുടുങ്ങിക്കിടക്കുന്നു
ഒരു മണ്ണിര

ഒരു പെണ്ണിന്റെ
മുടിയിഴകളില്‍
കുടുങ്ങിക്കിടക്കുന്നു
നൂറുറുമ്പുകള്‍

ഒരു പെണ്ണിന്റെ
മുടിയിഴകളില്‍
കുടുങ്ങിക്കിടക്കുന്നു
ഞാന്‍

എത്ര ആണധികാര വ്യവസ്ഥകള്‍
എത്ര കൊടികുത്തിയ കൊമ്പന്‍മാര്‍
എത്ര മെയില്‍ ഷോവനിസ്റ്റിക് പന്നികള്‍
വീണുപോയിരിക്കുന്നു
ഒരു പെണ്ണിന്റെ അടിമുടിയിഴകളില്‍
പിന്നെയല്ലേ
ഒരു മണ്ണിര
നൂറുറുമ്പുകള്‍
ഞാന്‍

നമ്മുടെ കാലത്തെ ആദരണീയനായ എഴുത്തുകാരന്‍

2010-11-24T01:06:00.000-08:00

നമ്മുടെ കാലത്തെ
ആദരണീയനായ എഴുത്തുകാരനെ
ഒരു വായനക്കാരനെന്ന നിലയില്‍
ഒരിക്കല്‍ പരിചയപ്പെട്ടു

എഴുപതുകളുടെ മധ്യാഹ്നത്തില്‍നിന്ന്
എണ്‍പതുകളും
തൊണ്ണൂറുകളും താണ്ടി
രണ്ടായിരത്തിപ്പത്തില്‍ എത്തിയതായിരുന്നു അയാള്‍

സര്‍ ,
എന്റെ പേരിതാണ്‌
ഇന്നതു ചെയ്യുന്നു
ഇവിടെനിന്നാണ്‌ വരുന്നത്‌
ഇങ്ങനെ..
ഇങ്ങനെ...

എത്ര നല്ല മനുഷ്യന്‍...
ക്ഷമയോടെ കേട്ടു,
ചിരിച്ചു ,
ഹസ്തദാനം ചെയ്തു

നമ്മുടെ കാലത്തെ
ആദരണീയനായ എഴുത്തുകാരനെ
ഞാന്‍ വീണ്ടും കണ്ടുമുട്ടി

സര്‍ എന്റെ പേരിതാണ്‌
ഇന്നതു ചെയ്യുന്നു
ഇന്നയിടത്തുവെച്ച് പരിചയപ്പെട്ടിട്ടുണ്ട്
ഇങ്ങനെ...
ഇങ്ങനെ....

നമ്മുടെ കാലത്തെ
ആദരണീയനായ എഴുത്തുകാരനെ
ഞാന്‍ മൂന്നാമതും
നാലാമതും പരിചയപ്പെട്ടു...

നമ്മുടെ കാലത്തെ
ആദരണീയനായ എഴുത്തുകാരനെ
ഞാന്‍ പതിനൊന്നാമത് പരിചയപ്പെട്ടു
സര്‍ ..
ഇങ്ങനെ...
ഇങ്ങനെ...

നമ്മുടെ കാലത്തെ
ആദരണീയനായ എഴുത്തുകാരനെ
തടിച്ച് കൊഴുത്ത്
അല്‍പം വായാടിയായ
എന്റെ സഹപ്രവര്‍ത്തക
ഒരിക്കല്‍
പരിചയപ്പെട്ടു

സര്‍,
എന്റെ പേരിതാണ്‌
ഇന്നതു ചെയ്യുന്നു
ഭര്‍ത്താവ്...
ഇങ്ങനെ...
ഇങ്ങനെ....

നമ്മുടെ കാലത്തെ
ആദരണീയനായ എഴുത്തുകാരന്‍
അന്നു രാത്രിതന്നെ
തിരിച്ചു വിളിച്ചു

അവളുടെ ഹലോട്യൂണിനെക്കുറിച്ചായി
പിന്നെ സംസാരം
ആ വരികളുടെ മഹത്വത്തെക്കുറിച്ച്
നമ്മുടെ കാലത്തെ
ആദരണീയനായ എഴുത്തുകാരന്‍
ആ [അ] സമയത്ത് ഒരുപന്യാസം തന്നെ പറയുകയുണ്ടായി

അടുത്ത ദിവസവും
അതിനടുത്ത ദിവസവും
നമ്മുടെ കാലത്തെ
ആദരണീയനായ എഴുത്തുകാരന്‍
അവളെ വിളിക്കുകയുണ്ടായി

നമ്മുടെ കാലത്തെ
ആദരണീയനായ എഴുത്തുകാരന്‍
തന്നെ വിളിക്കുന്നതിലുള്ള
ആത്മസന്തോഷം കൊണ്ട്
ഭര്‍ത്താവിന്‌ പരിചയപ്പെടുത്താനും
അവള്‍ മറന്നില്ല

നമ്മുടെ കാലത്തെ
ആദരണീയനായ എഴുത്തുകാരന്‍
ആറാമതും
ഏഴാമതും
അര്‍ധരാത്രി വിളിച്ചപ്പോള്‍
അവള്‍ ഫോണെടുത്തില്ല

പിറ്റേന്നു വിളിച്ചപ്പോള്‍
ഭര്‍ത്താവിന്‌ ഇഷ്ടമാകില്ല അതുകൊണ്ടാണ്‌
എന്നൊരു കള്ളം പറയാനും
അവള്‍ മറന്നില്ല

ഇത്തവണ
കുടുംബത്തെക്കുറിച്ചായിരുന്നു
നമ്മുടെ കാലത്തെ
ആദരണീയനായ എഴുത്തുകാരന്റെ
ഉപന്യാസം

നമ്മുടെ കാലത്തെ
ആദരണീയനായ എഴുത്തുകാരന്‍
പതിനൊന്നാമതും വിളിച്ചു

അവളുടെ ശബ്ധം കേള്‍ക്കാതെ
അയാള്‍ക്കുറങ്ങാനാവില്ല
എന്നൊരെസ്സെമ്മസ്സായിരുന്നു
അടുത്തത്‌

നമ്മുടെ കാലത്തെ
ആദരണീയനായ എഴുത്തുകാരന്‍
നൂറ്റിപ്പതിനൊന്നാമതും ...

ഏകാന്തത

2010-11-21T21:18:00.000-08:00

ഏകാന്ധത എന്ന്
തെറ്റിച്ചെഴുതിയാല്‍ കിട്ടും
ഏകാന്തത എന്ന വാക്കിന്റെ
യഥാര്‍ഥ അര്‍ത്ഥം

അവനവനില്‍
[അവനവനെക്കുറിച്ചും]
അന്ധനായിരിക്കുന്നവന്റെ
അവസാനത്തെ
അഭയമല്ലാതെ
മറ്റൊന്നുമല്ല
അത്‌

[മംഗലശ്ശേരി] നീലകണ്‌ഠന്‍

2010-11-18T04:00:00.000-08:00

പറഞ്ഞുപോയ ഒരു വാക്കിന്റെ പേരില്‍
പത്തുദിവസം
പിണങ്ങിയിരുന്നു ഒരുവള്‍

പറഞ്ഞ വാക്കിന്റെ പേരിലല്ല
കേട്ട വാക്കിന്റെ പേരിലായിരുന്നു
ആ പിണക്കമെന്ന്
പതിനൊന്നാമത്തെ ദിവസം
മനസ്സിലായി

പറയുന്ന വാക്കുകളല്ല കേള്‍ക്കുന്ന വാക്കുകള്‍
പ്രത്യേകിച്ചും
പറയുന്ന ആളും
കേള്‍ക്കുന്ന ആളും
പല കാലങ്ങളില്‍
പല ലോകങ്ങളില്‍
പല ജീവിതങ്ങളില്‍
ജീവിക്കുമ്പോള്‍

"ആദിയില്‍ വചനമുണ്ടായി
വചനം ദൈവമായായിരുന്നു"

വീണ്ടുമൊരു വെറും വാക്കാണ്‌
അവളുടെ പിണക്കം മാറ്റിയത്‌

വാക്കുകളെ വെറുതെ വിടുക
അലഞ്ഞു നടന്നോ
അയവിറക്കിയോ
അസ്ഥാനത്ത്
അലങ്കരിച്ചോ
അതെങ്ങനെയെങ്കിലും
ജീവിച്ചുകൊള്ളട്ടേ

കഴുത്തില്‍
കുടുങ്ങിയ
കാളകൂടം
കവിതയിലെങ്കിലും
കക്കിയിട്ടേ പറ്റൂ

ഒറ്റ സ്നാപ്പ്

2010-11-16T00:01:00.000-08:00

പെരുമഴയില്‍
ഓരോ തുള്ളിയും
ഒടുക്കത്തെ വെപ്രാളത്തോടെ
എവിടേക്കെന്നില്ലാതെ
ഒഴുകിപ്പോകും

എത്ര നിന്ന് കാലുകഴച്ചാലും
വെയിലുവീണ്‌ വരട്ടിക്കളഞ്ഞാലും
കാറ്റുവന്നു കുലുക്കി കൊഴിച്ചാലും
ആകെക്കുഴമറിഞ്ഞൊരു ലോകത്തിന്റെ
ഒറ്റ സ്നാപ്പെങ്കിലുമെടുക്കാതെ
ഒടുങ്ങില്ല
ഒടുക്കത്തെ
ഓരോ തുള്ളിയും

ഒച്ചുകളുടെ ചരിത്രം

2010-11-11T23:17:00.000-08:00

മരം മുറിച്ചതിനോ
മണ്ണുമാന്തിയതിനോ
ഒച്ചിഴയുന്നപോലെ എന്ന്
ഒച്ചവെച്ചതിനോ
ആയിരിക്കില്ല

വേഗങ്ങളുടെ
വിപരീതമായ
വിമാനത്തിന്‌
തങ്ങളുടെ രൂപംനല്‍കിയ
നെറികേടിനായിരിക്കും
ഒച്ചുകളുടെ ചരിത്രം
മനുഷ്യന്‌
മാപ്പുനല്‍കാതിരിക്കുക

ഫോട്ടോ ബ്ലോഗ്

2010-10-07T09:57:00.000-07:00

പുതിയ ഫോട്ടോ ബ്ലോഗ്. http://manushyar-mukhangngal.blogspot.com/

മാതംഗി

2010-09-06T16:36:00.000-07:00

[കുമാരനാശാന്റെയും കല്പറ്റ നാരായണന്റെയും ലതീഷ് മോഹന്റെയും മാതംഗിമാരെ ഓര്‍മിച്ച്]

വെളുക്കുവോളം
വെള്ളം കോരിയിട്ടും
ആനന്ദന്‍ വന്നില്ല

വെളുക്കാന്‍ മാത്രം
അവള്‍ കറുത്തിട്ടൊന്നുമായിരുന്നില്ല

വെളുത്തു കഴിഞ്ഞപ്പോള്‍
ഒരു മിസ്സ്കോളുവന്നു
മിസ്സാകണ്ട എന്നുകരുതി
റോഡ്‌സൈഡിലേക്ക് മാറിനിന്നുവിളിച്ചു

പെണ്ണുകെട്ടി
പുരകെട്ടി
പൊറുക്കുകയാണെന്നും
പൊറുക്കണമെന്നും
ആനന്ദന്‍ പറഞ്ഞു
പെങ്ങളെ കെട്ടിക്കാനുള്ള
പണം തന്നത്‌ അവളാണ്‌
വേറെ വഴിയുണ്ടായിരുന്നില്ല

വഴികളെക്കുറിച്ചും
വിദ്യകളെക്കുറിച്ചും
മാതംഗി ചോദിച്ചില്ല
അവള്‍ സുന്ദരിയാണോ
എന്നുമാത്രം ചോദിച്ചു

നിന്റെയത്ര വരില്ല
ആനന്ദന്‍ പറഞ്ഞു

അവള്‍ മിടുക്കിയാണോ
നിനക്കു വേണ്ടതൊക്കെ
ചെയ്തുതരുന്നുണ്ടോ

അവളോരു പൊട്ടിയാണ്‌
ലജ്ജാവതിയുമാണ്‌
ആനന്ദന്‍ പറഞ്ഞു

കോളുകട്ടുചെയ്ത്‌
മാതംഗി
കിണറ്റിന്‍കരയിലേക്ക് നടന്നു

വെള്ളം കോരാനോ
വെള്ളത്തില്‍ ചാടാനോ അല്ല
കിണറിന്റെ ആഴമുള്ള കൂട്ട്
അവള്‍ കൊതിച്ചിരുന്നതുകൊണ്ട്

ഒരു കാമുകന്റെ കുറ്റസമ്മതം [ അതേ കവിതയുടെ പുനരാഖ്യാനം ]

2010-03-07T11:13:00.000-08:00

പ്രദോഷം മുതല്‍ പ്രഭാതം വരെ
മുടിമുതല്‍ അടിവരെ
കുറുകയും നെടുകയും
കുറുകിയും കുരച്ചും
കുഴങ്ങിയും മയങ്ങിയും
ഉണര്‍ന്നും തളര്‍ന്നും
എത്രവട്ടം
എത്ര വര്‍ഷം
കയറിയിറങ്ങിയതാണ്‌
എന്റെ വണ്ടി നിന്റെമേല്‍

നിന്റെ മുലകള്‍ക്കിടയിലെ
തുടിക്കുന്ന വിടവുകാണാന്‍
മറ്റൊരാള്‍ വന്നെന്റെ പാളം
മുറിച്ചിടേണ്ടിവന്നല്ലോ

ഒരു ചോദ്യം

2010-03-03T11:51:00.000-08:00

മുന്നോട്ടുതള്ളിയ
രണ്ടു മുലകള്‍ക്കിടയിലായതിനാലാണോ
പെണ്ണേ
നിന്റെ പിന്നോട്ടുതള്ളിയ ഹൃദയം
ആരും കാണാതെപോകുന്നത്‌ ?

ഭാഷയും പാഷാണവും

2010-02-03T11:35:00.000-08:00

1.വിശ്വാസം

വിശ്വാസം എന്ന വാക്കിനെക്കുറിച്ച്
ഉപന്യാസമെഴുതാനിരിക്കുകയാണ്‌

മനുഷ്യരിലുള്ള വിശ്വാസം
നഷ്ടപ്പെട്ടുവെന്ന്
പലരോടും
പറഞ്ഞുനടന്നതാണ്‌

ദൈവത്തിലുള്ള വിശ്വാസം
അതിനുമെത്രയോ മുമ്പെ
നഷ്ടപ്പെട്ടതാണ്‌

നിഘണ്ടു
എങ്ങനെ നിര്‍വചിക്കുന്നു എന്നറിയാന്‍
വെറുതെ പരതിനോക്കി

ആരോ
ആ പുറം
പറിച്ചു കളഞ്ഞിരുന്നു

ആശ്വാസം

2.കവിത

ചിലപ്പോള്‍
അക്ഷരങ്ങളോ
ആംഗ്യങ്ങളോ മാത്രമുള്ള
നിശ്ശബ്ധതകളാകും
കവിത

ചിലപ്പോള്‍
വാക്കുകളും
നിയതമായ അര്‍ഥങ്ങളും മാത്രമുള്ള
നിഘണ്ടുവാണ്‌ കവിത

അപ്പോള്‍ രീതി, ധ്വനി, അലങ്കാരം ???
ആ...ആര്‍ക്കറിയാം

അടുത്ത മുറിയിലിരുന്ന്
അഞ്ചുവയസ്സുകാരി
അ ആ ഇ ഈ .. എന്ന്
ആവര്‍ത്തിച്ചുരുവിടുന്നുണ്ട്

ഒ...ഓ..
അര്‍ഥങ്ങളുടെ പെരുങ്കാട്ടില്‍
അവളെങ്ങനെ പുലരും ...
വളരും ...

മോളെ
ഇക്കാണുന്ന വാക്കുകള്‍ക്കൊന്നും
ഒരര്‍ഥവുമില്ല
ഈ തടിച്ച പുസ്തകം
നീ കയറിയിറങ്ങേണ്ട
കൊടുമുടിയുമല്ല

വാക്കുകള്‍ക്കു നീ ചെവികൊടുക്കരുതേ

വ്യാഖ്യാനങ്ങളൊക്കെയും
വിഡ്ഡികളുടെ വെപ്രാളങ്ങളാണ്‌

വേരുകള്‍ക്കുമിലകള്‍ക്കുമിടയിലെവിടെയോ...

2010-01-24T10:57:00.000-08:00

കോഴിയാണോ
മുട്ടയാണോ
ആദ്യമുണ്ടായതെന്ന്
എല്ലാവരും ചോദിച്ചു

ദൈവമില്ലെന്നു പറഞ്ഞപ്പോഴൊക്കെ
ഉത്തരം മുട്ടിക്കാന്‍
ആവര്‍ത്തിച്ചു ചോദിച്ചു

വേരാണോ
ഇലയാണോ
ആദ്യമുണ്ടായതെന്ന്
ആരും ചോദിച്ചില്ല

കോഴികളെപ്പോലെയല്ല
ഇലകള്‍

നട്ടുച്ചയ്ക്ക്
ഉറങ്ങിയുണരുന്നവന്റെ കട്ടിലില്‍
മുട്ടയുടെ ചുടുഗന്ധമില്ല

സ്മരണകളിലുലാത്തുമ്പോള്‍
അയ്യേ എന്ന
ദുര്‍ഗന്ധമില്ല
കേബിള്‍ വയറില്‍നിന്ന്
ഫാന്‍ ചിറകിലേക്കും
ഉത്തരത്തിലേക്കും
ഊണുമേശയിലേക്കുമുള്ള
എടുത്തുചാട്ടങ്ങളില്ല

ഇരുപത്തിയൊന്നു ദിവസത്തെ
കാത്തിരിപ്പിന്റെ
കുഞ്ഞുകൌതുകങ്ങളില്ല

പൊരുന്നക്കോഴിയുടെ
പിടിവാശികളില്ല
അമ്മക്കോഴിയുടെ
അവസരവാദങ്ങളില്ല

കിണറ്റില്‍ച്ചാടുമോയെന്ന
ആധിയില്ല
പൂതബാധകളില്ല

കോഴികളെപ്പോലെയല്ല
ഇലകള്‍

വല്ലപ്പോഴുമൊരിക്കല്‍
ആകാംക്ഷകൊണ്ടുമാത്രം
ജനല്‍ച്ചില്ലില്‍
വന്നെത്തിനോക്കിയാലായി

കാറ്റിന്റെ
കൂട്ട് കൂടിയതുകൊണ്ടുമാത്രം
അടുത്ത പറമ്പിലെങ്ങാനുമെത്തിയാലായി

കോഴികളെപ്പോലെയല്ല
ഇലകള്‍

ഇലകളുടെ പുസ്തകം
മറിച്ചുനോക്കാതെ
ഒരുകോഴിയും
ഇന്നുവരെ
വളര്‍ന്നിട്ടില്ല

വേരുകളാണോ
ഇലകളാണോ
ആദ്യമുണ്ടായത്‌?

വേരുകളില്ലാത്ത
ഇലകളുണ്ടോ
ഇലകളില്ലാത്ത
വേരുകളുണ്ടോ?

ആറടി താഴ്ചയ്ക്കും താഴെ
പാതാളത്തോളമെത്തുന്ന
വേരുകള്‍

ആറടി ഉയരത്തിനുമുയരെ
ആകാശത്തോളമെത്തുന്ന
വേരുകള്‍

ഓരോ ചുവടുപറിയുമ്പോഴും
വേരുപറിയുന്ന ഒച്ച
ഓരോ ചുവടു പതിയുമ്പോഴും
വേരുപൊട്ടുന്ന ഒച്ച

വേരുകളില്‍നിന്ന്
ഇലകളിലേക്കും
ഇലകളില്‍നിന്ന്
വേരുകളിലേക്കുമുള്ള
നെട്ടോട്ടത്തിനിടയില്‍
ഒന്നു
നിന്നു
മുഖം നോക്കാന്‍
എന്റെ ട്രാഫിക് ഐലന്ട്
എവിടെയാണ്‌ ?

ഇലകളുടെ ഭുപടം

2009-10-24T13:11:00.000-07:00

നഗരത്തിലെ ഓഫീസില്‍
ചില്ലുടുപ്പിട്ട
ചതുരമുറിയിലിരുന്ന്
നട്ടപ്പാതിരയ്ക്ക്
ഇലകളുടെ ഭുപടത്തില്‍
ഞാനെന്റെ ഗ്രാമത്തിലെ
വീടുതിരയുന്നു

വീടിനോടുചേര്‍ന്ന
റബര്‍തോട്ടം തിരയുന്നു
തേക്കിലയുമായിവന്ന്
കൂക്കിവിളിക്കുന്ന
മീന്‍കാരന്‍
മൊയ്തീനെത്തിരയുന്നു
പട്ടിയുടെ വരിയെടുക്കാന്‍
പാത്തുപതുങ്ങിയെത്തുന്ന
മത്തായിച്ചേട്ടനെത്തിരയുന്നു
നായിക്കമ്പറമ്പില്‍കാരുടെ
ചായക്കടതിരയുന്നു
ഇരുതുടകളിലും കൈവെച്ച്
ഇടക്കുള്ളവനെ ഉണര്‍ത്തുന്ന
ഇട്ടൂപ്പുചേട്ടന്റെ
ബാര്‍ബര്‍ഷോപ്പ് തിരയുന്നു
പത്തുമണി പെണ്കുട്ടിയേയും കൊണ്ട്
പറന്നുപോകുന്ന
ഫാത്തിമ ബസ്സുതിരയുന്നു

മലാന്‍ വന്നടിഞ്ഞ
കടവുതിരയുന്നു
മലാന്‍കടവ് ആര്‍ട്സ് ആന്‍റ്‌
സ്പോര്‍ട്സ് ക്ലബ് തിരയുന്നു
മുച്ചീട്ടുകളിക്കാരുടെ
മെഴുകുതിരി വെളിച്ചത്തില്‍
മെഴുവേലിബാബുജിയുടെ
മഞ്ഞപ്പുസ്തകം തിരയുന്നു

കുട്ടിക്കുപ്പായമിട്ട്
കുളിച്ചുകേറുന്ന
കുഞ്ഞമ്മായിയെ തിരയുന്നു
ഈറ്റക്കാടുകള്‍ക്കിടയില്‍ വീണ
വാണത്തിന്റെ
വിത്തുതിരയുന്നു

നഗരത്തിലെ ഓഫീസില്‍
ചില്ലുടുപ്പിട്ട
ചതുരമുറിയിലിരുന്ന്
നട്ടപ്പാതിരയ്ക്ക്
ഇലകളുടെ ഭുപടത്തില്‍ ഞാനെന്നെത്തിരയുന്നു

ആഴങ്ങളിലേക്കോ
ആരോഹണങ്ങളിലേക്കൊപോകാതെ
അലഞ്ഞുതിരിയുന്ന
ഈ പച്ചഞരമ്പുകള്‍
എന്റെതന്നെ വേരുകളാണ്‌
എന്നൊക്കെ പറഞ്ഞവസാനിപ്പിക്കും മുമ്പൊരുചോദ്യം
നട്ടപ്പാതിരയ്ക്ക്
പോണ്‍ സൈറ്റില്‍
പെണ്ണുടലുകള്‍
പരതുന്നവന്റെ
പെടാപ്പാട് നിനക്കറിയുമോ വായനക്കാരീ[രാ]

ഏകാന്ധത

2009-10-20T12:40:00.000-07:00

ഏകാന്തത ഏകാന്തത എന്ന്
കേട്ടുകേട്ടു ചടച്ച്
ഇറങ്ങിനടന്നൂ ഏകാന്തത
ഏകാന്തത എന്ന വാക്കിന്റെ
വീട്ടില്‍നിന്നും

ഫ്രെയ്മില്‍ ഒരില

2009-10-14T12:21:00.000-07:00

സ്ഖലനത്തിനു തൊട്ടുമുന്‍പുള്ള നിമിഷത്തിന്റെ
അനിശ്ചിതത്വം പോലെ

ഫ്രെയ്മില്‍ ,

അകത്തേക്കും
പുറത്തേക്കും
ഇളകിയാടിക്കൊണ്ടിരുന്നു
വെളിച്ചത്തിന്റെ പലനിലകള്‍
നിറങ്ങളെ
സവിശേഷമായി സന്നിവേശിപ്പിച്ച
ഒരില

കൈകള്‍ കുഴഞ്ഞുതുടങ്ങി
ശ്വസം നിലച്ചുതുടങ്ങി
ശരീരം കിതച്ചുതുടങ്ങി
അവസാനമായി ഉയര്‍ന്നുതാഴേണ്ട വിരലുകള്‍
വിറച്ചുതുടങ്ങി

പിന്‍വാങ്ങിയാലോ എന്നതോന്നല്‍
പിന്നില്‍നിന്ന് പിടിച്ചുവലിച്ചുതുടങ്ങി

അനങ്ങരുതേ
അനങ്ങരുതേ
അനങ്ങരുതേ

ഒരനക്കം മതി
അപാരതയെ അനുഭവി[പ്പി]ക്കേണ്ടിയിരുന്ന
ഒരു നിമിഷം
സ്ഖലിച്ചില്ലാതാവാന്‍

മണ്ണാങ്കട്ടയും കരിയിലയും

2009-09-30T13:01:00.000-07:00

മണ്ണാങ്കട്ടയും കരിയിലയും

കാശിക്കുപോയി

കാശിയിലേക്കുമാത്രമല്ല

ഹരിദ്വാറിലേക്കും ഗയയിലേക്കും

അയോധ്യയിലേക്കും നൈമിഷാരണ്യത്തിലേക്കും പോയി

വിവേകാനന്ദ ട്രാവല്‍സിന്റെ

ടൂര്‍പാക്കേജിലാണു പോയത്‌

ഗംഗയില്‍ മുങ്ങിനിവര്‍ന്നു

കൈലാസനാഥനെ തൊഴുതുനിവര്‍ന്നു

ഉറക്കച്ചടവില്‍ മൂരിനിവര്‍ന്നു

കാറ്റുവീശാതിരുന്നില്ല

മഴ പെയ്യാതെയുമിരുന്നില്ല

സ്വറ്ററിട്ടിട്ടുണ്ടായിരുന്നു

ഷട്ടറുതാഴ്ത്തിയിരുന്നു

ഒരു ചുക്കും സംഭവിച്ചില്ല

ജീവിതമേ

2009-09-25T13:12:00.000-07:00

ഗൃഹാതുരമായൊന്ന്

പല്ലുതേക്കാമെന്നുകരുതി

നീണ്ടതാണ്‌

വെളിച്ചത്തിനെതിരേ നില്‍ക്കുന്ന

മാവിലക്കുനേരെ

ഒരു കൈ

പച്ചയുടെ വരമ്പിലെ

വേരുകളുടെ വെപ്രാളംകണ്ട്

ഓ ജീവിതമേ എന്ന്

ആര്‍ത്തലച്ച്

ഉള്‍വലിഞ്ഞു അത്‌

ഇലകളുടെ ബൈബിള്‍

2009-09-22T12:05:00.000-07:00

കൈയ്യാലപ്പുറത്തുവീണ ഒരില
ഏതുപറമ്പിലെ വളമാകണമെന്ന്
ഒരുനിമിഷം ശങ്കിച്ച്
കാറ്റല്ലാതെ മറ്റൊരു ദൈവം നിനക്കുണ്ടാകരുത്‌ എന്ന
ഇലകളുടെ ബൈബിളിലെ ഒന്നാം പ്രമാണം
ആവര്‍ത്തിച്ചുരുവിട്ടുകൊണ്ട്
താഴേക്കുതുഴഞ്ഞു

പ്രതി സന്ധി

2009-09-16T12:37:00.000-07:00

വെളുക്കുവോളം

വെള്ളംകോരി

വിലോഭിപ്പിച്ചതെന്തിനായിരുന്നൂ

വിലാസിനീ ...

നിന്നെ സന്ധിക്കുന്നതിനായിമാത്രം

വാങ്ങിവെച്ച

വി.ഐ.പി. ഫ്രെഞ്ചി

വെറുതെയായല്ലോ

വെളിച്ചം

2009-09-05T12:58:00.000-07:00

വെളിച്ചം വീണതിന്റെ
ഉല്ലാസം
പുരപ്പുറത്തുനിന്ന്
ഉദ്ഘോഷിക്കുന്നു
പൂവന്‍കോഴി

വെളിവുപോണതിന്റെ
ഉന്മാദം
പൂരപ്പറമ്പില്‍ കിടന്ന്
ആഘോഷിക്കുന്നവരുടെ
നാട്ടില്‍

ഋതു

2009-08-12T12:26:00.000-07:00

പ്രണയിക്കുന്നവന്റെ ശരീരം
ഒരേസമയം
ഒരുപാടു ഋതുക്കളെ
കൊണ്ടുനടക്കുന്നു

ഒരൊറ്റനോട്ടംകൊണ്ട്
പൂമരമാകാനും
നോട്ടക്കുറവുകൊണ്ട്
പുഴുമരമാകാനും
അതിനു കഴിയും

മഴയോ മഞ്ഞോ വെയിലോ
ഇതുപോലെ
മറ്റെവിടെയും പെയ്യുന്നില്ല
കരച്ചിലോ എരിച്ചിലോ പുകച്ചിലോ
ഇതുപോലെ മറ്റാരുമറിയുന്നില്ല

ഉദയാസ്തമയങ്ങള്‍
അവനില്‍ ഏശുന്നതേയില്ല

കാമുകിയെ
കാത്തിരിക്കുമ്പോഴല്ലാതെ
വാച്ചുനോക്കാറില്ല
.....

ഒരുനാള്‍
ഓടവെള്ളത്തില്‍
ചീര്‍ത്തുപൊന്തിയനിലയില്‍
കാമുകന്റെ ജഡം കണ്ടെത്തി

പോസ്റ്റുമോര്‍ട്ടം പരിശോധനയില്‍
രൂപകങ്ങളുടെ ആധിക്യത്താല്‍
പോക്കുവരവുകള്‍ നിലച്ച
ഒരു ഹൃദയം
ഡോക്ടര്‍ കണ്ടെത്തി

ഒരു മഞ്ഞുകട്ട
ഒരു വെയില്‍ച്ചീള്‍
നിലാവിന്റെ ഒരു കഷണം
ഒറ്റമരം
കൊഴിഞ്ഞ ഇല
അന്തിമാനം
ലോകാവസാനം വരേക്കും
ടാറ്റ ടു ടാറ്റ ഫ്രീയായിട്ടുള്ള സിം
ബാലചന്ദ്രന്‍ ചുള്ളിക്കാടിന്റെ
പ്രണയകവിതകളുടെ
പൊട്ടിയ സീഡി
എന്നിങ്ങനെ ടേബിളില്‍ നിരന്നു

പരിശോധനാമുറിയില്‍നിന്നിറങ്ങുമ്പോള്‍
നിലതെറ്റാത്ത
നാലുപെഗ്ഗില്‍
നാളിതുവരെ
താന്‍ അലിയിച്ചുകളഞ്ഞുകൊണ്ടേയിരുന്ന
രൂപകങ്ങളേക്കുറിച്ചായി
ഡോക്ടറുടെ ചിന്ത

മരണത്തെക്കുറിച്ച് ഒരു മധുരഗീതം

2009-07-07T12:12:00.000-07:00

ഈ രാത്രി
അവളോടൊത്ത് ചിലവഴിക്കാമെന്ന്
വാക്കുകൊടുത്തതാണ്‌

പത്തുകൊല്ലം
പള്ളിയില്‍പ്പോയതിന്റെ
പാപബോധംകൊണ്ടാകണം
പോകുന്നകാര്യം മാത്രം
മറ്റവളോടു പറഞ്ഞു

പോയാല്‍
ചത്തുകളയുമെന്ന്
അവള്‍ പറഞ്ഞു
അടുപ്പില്‍നിന്ന്
ഒരുതീക്കൊള്ളിയെടുത്ത്
കൈയില്‍ വെച്ച് ഉദാഹരിച്ചു

വെന്ത മാംസത്തിന്റെ
മണം വന്നപ്പോള്‍
ഉണര്‍ന്ന ലിംഗം
അതുപോലെ ഉറങ്ങി

ഉണര്‍ന്നപ്പോള്‍
ചാകുന്നെങ്കില്‍ ചാക്
പോ പുല്ലെ എന്നുപറഞ്ഞിറങ്ങി

പോകുന്നപോക്കില്‍
പോക്കറ്റിലെ ഫോണ്‍ വിറച്ചു
അവള്‍ മറ്റവന്റെ കട്ടിലിലാണെന്നുമാത്രം
ഒരു മെസ്സേജ്

...
ഒരു രാത്രിമുഴുവന്‍
ഉറങ്ങാതിരുന്നതിന്റെ പക
അവളുടെ കണ്ണില്‍
അനുനയിപ്പിക്കാന്‍
മണിക്കൂറുകളെടുത്തു

ഒടുവില്‍ ആ കൈ കഴുത്തില്‍ ചുറ്റിയപ്പോള്‍
ഒരുപാടുകാലത്തെ ഋതുക്കള്‍
ഒരുമിച്ചുണര്‍ന്നു
സ്വയംഭോഗത്തിന്റെ പാതിരകളില്‍
നട്ടുച്ചയുടെ വെയില്‍പൂത്തു
രോമങ്ങള്‍
ഉണര്‍ന്ന്
കോട്ടുവായിട്ട്
ഇത്രകാലവും
ചെരിഞ്ഞ്,
ചൊറിഞ്ഞ്
കിടന്നതിന്റെ
ക്ഷീണം മാറ്റി

എത്ര വൈകി വൈകി വൈകിയാണ്‌
ആ കൈ
അരക്കെട്ടോളമെത്തിയത്
എത്ര വൈകി വൈകി വൈകിയാണ്‌
അരക്കെട്ടിലെ ചെരിഞ്ഞ ഗോപുരത്തില്‍
മിനുക്കുപണികള്‍ തുടങ്ങിയത്‌

അപ്പൊഴാണ്‌
അവളുടെ മറ്റവന്റെ
ബുള്ളറ്റിന്റെ
കടകട ശബ്ദം
മുറ്റത്തുവന്ന് നിന്നത്‌

.
.
.
.
ഞാനിതാ
ആടയാഭരണങ്ങളില്ലാതെ
ആധിവ്യാധികളില്ലാതെ
ആദിമധ്യാന്തങ്ങളില്ലാതെ
വടിയായി
നില്‍ക്കുന്നു
എന്നെങ്കിലും
വരുന്നെങ്കില്‍
ഇതുപോലെ വരണം
മൈരുമരണമേ

നട്ടെല്ലോ? അതേതെല്ല്? അതില്ലേലെന്ത്?

2009-04-21T12:48:00.000-07:00

നട്ടെല്ലിലൂടെ ഒരു പുഴ ഒഴുകുന്നു

പുഴയില്‍നിന്ന് കരയിലേക്കും
കരയില്‍നിന്ന് പുഴയിലേക്കും
ചില കുഴലുകള്‍ തുറക്കുന്നു

വെയില്‍കൊണ്ട് വലഞ്ഞ മണല്‍
ലോറിയില്‍ക്കയറി
നഗരംകാണാനിറങ്ങുന്നു

ഊണുമേശയിലെ
ഉദ്യാനത്തില്‍
ഉടുത്തൊരുങ്ങിക്കിടക്കാന്‍ കൊതിച്ച്
മീനുകള്‍
പഴുതില്ലാത്ത വലയോ
ചൂണ്ടയോ തേടി നടക്കുന്നു

ഇരു വശങ്ങളിലെയും മതിലുകള്‍
കൃത്യമായ ഇടവേളകളില്‍
പുഴയിലേക്കിറങ്ങുന്നു

ഒരു കുടം
ഒരു ജഡം
തെന്നിച്ചുവിട്ട ഒരു കല്ല്‌
ഊരിപ്പിഴിയുന്ന ഒരുടുമുണ്ട്
ഉണക്കമരത്തിലെ
ഒഴുക്കുമോഹിച്ച ഒരുചില്ല
എന്നിങ്ങനെ
ഓര്‍ക്കാപ്പുറത്ത്
ഓരോന്ന്
വന്നുവീഴുന്നു

പുല്ലുതേടിയിറങ്ങിയ ഒരു പയ്യ്
ഒന്നുമുഖംനോക്കി
ഒന്നു മാനം നോക്കി
ഒരിറക്കില്‍ ദാഹം തീര്‍ത്ത്
യാത്രതുടരുന്നു

നട്ടെല്ലിലെ പുഴ മെലിയുന്നു

പുഴ വെറുമൊരു കുഴിയാകുന്നു
കുളിതെറ്റിയൊരു പെണ്‍കുട്ടി
കുഴിയില്‍ച്ചാടുന്നു
-കുഴിയില്‍ച്ചാടിയൊരു
പെണ്‍കുട്ടിയുടെ കുളിതെറ്റുന്നു-

കുഴി
കടല്‍
കിനാവുകാണുന്നു

കണ്ണാടി കളവുപോയതറിയാതെ
കരയിലൊരു മരം
കുന്തിച്ചുനില്‍ക്കുന്നു

നോക്കിനോക്കിയിരിക്കെ

2009-04-01T14:04:00.000-07:00

നോക്കിനോക്കിയിരിക്കെ

വെണ്മേഘങ്ങള്‍

ചുവന്നു

പിന്നെ മാഞ്ഞു

നോക്കിനോക്കിയിരിക്കെ ...

കരയാതെ കരയേ

2009-03-25T13:43:00.000-07:00

ഓരോരോ തിരയായി വന്നുവന്ന്

നുരയുള്ള തലോടലില്‍ അലിഞ്ഞലിഞ്ഞ്

അടിവേരുനിന്ന നിലമാകെ പോയല്ലോ

അടിതൊട്ട് മുടിവരെ

ഉടലാകെ ഉലഞ്ഞല്ലോ

പത്രക്കാരെ

പടം പിടിക്കുന്നോരെ

ഓടിവരണെ

ഞാനിതാ

കടപുഴകി വീഴുന്നേ

കടല്‍ തഴുകി വീഴ്ത്തുന്നേ

അതേ പഴയ പ്രഭാതം

2009-03-21T12:34:00.000-07:00

വിനോദിനീ
ഒരു പ്രഭാതം കണ്ടിട്ട്
എത്രനാളായി

പോയവര്‍ഷം
ഇതുപോലൊരു ദിനത്തില്‍
ഇതുപോലൊരു വെളുപ്പിന്‌
ഇതുപോലെ ഉറക്കച്ചടവോടെ
ഉണര്‍ന്നതാണ്

പ്രണയദിനമാണ്‌
ഇന്നെങ്കിലും നേരത്തെ ഉണര്‍ന്നേപറ്റൂ
എന്നു നീ പറഞ്ഞിട്ടാണ്‌
എന്റെ
എസ്സെമ്മസിന്റെ മണിനാദം
കേട്ടുണരണമെന്നു ശഠിച്ചിട്ടാണ്

ഉറക്കത്തിലേക്കുള്ള പേച്ചുകള്‍ക്കിടയില്‍
ബാലന്‍സ് തീര്‍ന്നതറിയാതെ
ഉണര്‍ന്നതാണ്

മഞ്ഞ് ചുറ്റുന്ന മലകളെ നോക്കീട്ട്
പൂക്കള്‍ വീണുകിടക്കുന്ന ഇടവഴികള്‍ പിന്നിട്ട്
ഉലയുന്ന മുലയുമായ്
പെണ്‌കുട്ടികള്‍ ഉലാത്തുന്നത്‌ കണ്ടിട്ട്
മഴചാറുന്ന വഴിയില്‍
കുടയേതുമില്ലാതെ
റീചാര്‍ജ് കൂപ്പണ്‍ തേടി
അലഞ്ഞതാണ്‌

ഒന്നിനും ഒരു മാറ്റവുമില്ല
എല്ലാം പഴയതുപോലെതന്നെ

മലകളെ ചുറ്റാതെ
മഞ്ഞ് മാറിനില്‌ക്കുന്നുണ്ടാകാം
ഇടവഴിയില്‍ പൂക്കള്‍ വീഴ്ത്തുന്ന ചില മരങ്ങള്‍
വീണുപോയിട്ടുണ്ടാവാം
പെറ്റിക്കോട്ടിനുള്ളില്‍
ഇളകിയാടിക്കൊണ്ടിരുന്ന മുലകള്‍
സ്ഥാനക്കയറ്റം കിട്ടി
ഒന്നൊതുങ്ങി ഉറച്ചിട്ടുണ്ടാവാം

ഒന്നിനും ഒരു മാറ്റവുമില്ല
എല്ലാം പഴയതുപോലെതന്നെ

വിനോദിനീ
എനിക്കും നിനക്കുമിടയിലെ ശൂന്യതയില്‍
ഒഴുകിപ്പരന്ന വാക്കുകള്‍
വാക്കുകളുടെ വിലയിടിച്ചതല്ലാതെ
വിനിമയനിരക്ക് കുത്തനെ കൂട്ടിയതല്ലാതെ
വിനോദവ്യവസായത്തിന്‌
വെളുക്കുവോളം
വെള്ളംകോരിയതല്ലാതെ
ഒരുപാടു കലഹിച്ചതല്ലാതെ
ഒരുപാടു വിലോഭിച്ചതല്ലാതെ
ഒരിടത്തും നമ്മെ എത്തിച്ചില്ലല്ലോ
ഒരെത്തും പിടിയും കിട്ടുന്നില്ലല്ലോ

വിനോദിനീ
മുഷിഞ്ഞുമുഷിഞ്ഞു നാറിയ
ഈ പ്രണയത്തിന്റെ കുടുക്കുകളഴിച്ച്
നാമെന്നാണ്‌
നമ്മുടെ
സ്വന്തം
ശരീരത്തിലേക്കുണരുക ?

നാമെന്നാണ്‌
നമ്മുടെ
സ്വന്തം
ശരീരത്തില്‍
ശരിക്കൊന്നുറങ്ങുക ?

പുതുമഴ

2009-03-11T13:42:00.000-07:00

ഉണക്കച്ചുള്ളികള്‍
കെട്ടിപ്പുണര്‍ന്നൊഴുകുന്ന
കലക്കവെള്ളത്തില്‍
വേനല്‍ബുദ്ധന്‍
ചീര്‍ത്തുകിടക്കുന്നു

മാങ്ങ പ്രണയത്തിന്റെ പ്രതീകമായതെങ്ങനെ?

2009-03-02T00:50:00.000-08:00

പ്രണയത്തില്‍ വീഴുമ്പോള്‍

എല്ലാ വീഴ്ചകളിലുമെന്നതുപോലെ

പൊടുന്നനെ

ഒരുവന്‍

ഒറ്റക്കാകുന്നു

അവനോ ലോകമോ അറിയാതെ

അവന്‍ ലോകത്തെയും

ലോകം അവനെയും

വിട്ടുപോകുന്നു

ഒരുവള്‍ അവന്റെ കൈപിടിച്ച്

അസ്തിത്വത്തിന്റെ

അങ്ങാടിയിലൂടെ നടക്കുന്നു

ഭയം ,ഉത്കണ്ഠ, ഏകാകിത്വം

ഉണര്‍വ്വ്,ഉല്ലാസം , ഉന്മാദം

കരച്ചില്‍ ,എരിച്ചില്‍ ,പുകച്ചില്‍

അധികാരം ,അടിമത്തം ,അല്‍പത്തം

നാളിതുവരെ നിലനില്‍ക്കാത്തതോ

നിരീക്ഷിക്കപ്പെടാത്തതോ

നിര്‍വചിക്കപ്പെടാത്തതോ ആയ

നാനാജാതി നാറിത്തരങ്ങള്‍

എല്ലാം ഒന്നൊന്നായി

അവന്‌ കാണിച്ചുകൊടുക്കുന്നു

ഇത്രനാളും അവ എവിടെയായിരുന്നു,

അവളെവിടെയായിരുന്നു

താനെവിടെയായിരുന്നു

എന്നെല്ലാം

അവന്‍ അമ്പരക്കുന്നു

കണ്ണാടിയില്‍

തന്റെതന്നെ

പ്രതിബിംബങ്ങള്‍ കണ്ട്

പ്രതിച്ഛായകള്‍ കണ്ട്

പരാധീനതകള്‍ കണ്ട്

വിട്ടുപോകരുതേയെന്ന്

അവളെ കെട്ടിപ്പിടിച്ച്

പട്ടിയേപ്പോലെ കേഴുന്നു

അടഞ്ഞ മുറിയിലോ

ഇരുട്ടിലോ

ഇടനാഴിയിലോവെച്ച്

മുലകുടിച്ചോ

മടിയില്‍ തലചായ്ച്ചോ

മൂഡ്സിന്റെ മൂടുപൊട്ടിച്ചോ

അവളുടെ മാതൃത്വത്തെ ഉണര്‍ത്തി

തളര്‍ത്താന്‍ ശ്രമിക്കുന്നു

പ്രണയത്തില്‍ വീഴുമ്പോള്‍

എല്ലാ വീഴ്ചകളിലുമെന്നതുപോലെ

പൊടുന്നനെ

ഒരുവന്‍

ഒറ്റക്കാകുന്നു

ഉണരാന്‍

ഒരുപാടു വൈകിപ്പോകുന്നു

കൂട്ടിനോ

കുട്ടിക്കോ

കുമ്പസാരത്തിനോ

അവള്‍ പോരാതെയാകുന്നു

പരാതിയാകുന്നു

പരിഭവമാകുന്നു

പിണക്കമാകുന്നു

പിരിയലാകുന്നു

.........

ഒരു മാങ്ങ തലയില്‍ വീഴുമ്പോള്‍

മറ്റൊരുവന്‍ കണ്ടെത്തിയതുകൊണ്ടുമാത്രം

ഭൂഗുരുത്വം നിങ്ങള്‍ കണ്ടെത്തിയെന്നുവരില്ല

തരിപ്പിറങ്ങുമ്പൊഴെങ്കിലും

മാഞ്ചോട്ടില്‍നിന്ന്

മാറിനിന്നാലോയെന്നു

മനസ്സ്

മന്ത്രിച്ചുതുടങ്ങുന്നു

ഒന്നും കണ്ടെത്താത്തവര്‍

അടുത്തടുത്ത വീഴ്ച്ചകള്ക്കായി

അവിടെത്തന്നെ തുടരുന്നു

.....

2009-02-09T11:36:00.000-08:00

സിനിമാനടിയുടെ പിന്‍ഭാഗത്ത്

വിശാലമായ എസി ഷോറൂം

എന്ന പരസ്യവാചകം കണ്ട്

തിയേറ്ററില്‍

തലതല്ലിച്ചിരിച്ചവനാണു ഞാന്‍

ഇന്നിതാ

പുലര്‍ച്ചയ്ക്ക്

കൊടുംതണുപ്പത്ത്

കടത്തിണ്ണയില്‍

തൂക്കിവില്‍പ്പന എന്നെഴുതിയ

കീറത്തുണിയും പുതച്ച്

കുരച്ചുകിടക്കുകയാണ്

എല്ലും തോലും മാത്രമായ മനുഷ്യരൂപം

ഭോഗം

2009-01-20T12:01:00.000-08:00

മരിച്ചവനെ ഉയിര്‍പ്പിക്കും
രണ്ടപ്പം
രണ്ടായിരമായി തോന്നും
ക[ഉ]ടലിനുമീതെ നടക്കും , പറക്കും
വെള്ളം പാലാകും

പാവം കവി വാക്കുകള്‍ കൊണ്ട് വെറുതെ അവന്‍ എന്തുചെയ്യാനാണ്?

2009-01-04T11:51:00.000-08:00

ഈ കവിതയുടെ ആദ്യത്തെ വരികള്‍

ഒരുപക്ഷെ മറ്റേതെങ്കിലുമൊരു കാലത്ത്

എനിക്ക് എഴുതാന്‍ കഴിഞ്ഞേക്കാം

കഴിഞ്ഞില്ലെന്നും വരാം

അതവസാനിക്കുന്നത് ഇങ്ങനെയാണ്

ജീവിതമേ

ജീവിതമേ ജീവിതമേ...

ശരീരത്തേക്കാള്‍ വിനിമയശേഷികുറഞ്ഞ

വാക്കുകള്‍ തന്ന്

നീ എന്നെ ശിക്ഷിച്ചതെന്തിന് ?

ഉപരിപ്ലവം

2008-12-23T12:42:00.000-08:00

എനിക്കു മനസ്സിലായി

കൊതുകുവല

എങ്ങനെയാണു

പ്രതിവിപ്ലവകാരിയുടെ

പ്രതീകമായതെന്ന്.

ഓര്‍ക്കാപ്പുറത്ത്

ഒരൊറ്റ അടികൊണ്ട്

രക്തനക്ഷത്രം തീര്‍ക്കാനുള്ള

സാധ്യത

അതു തുലച്ചല്ലോ

ഹൈക്കു-4

2008-12-10T11:58:00.000-08:00

പ്രണയം

പൊലിഞ്ഞുപോയ

പുലര്‍ച്ചയില്‍

ബാല്യത്തിന്റെ തൂക്കുപാലം

ഒലിച്ചുപോയ്

വരികള്‍ തകര്‍ന്നേ പോയ്

ഹൈക്കു-3

2008-12-08T11:26:00.000-08:00

തോട്ടുവക്കത്തെ

കാട്ടുവഴിയിലൂടെ

കൂട്ടുകാരന്റെ

വീട്ടിലേക്കുപോകുമ്പോള്‍

പെണ്ണുങ്ങള്‍ കുളിക്കുന്നതുകണ്ടു

തോട്ടുവക്കത്തെ
കാട്ടുവഴിയിലൂടെ
കൂട്ടുകാരന്റെ
വീട്ടിലേക്കു വീണ്ടും വീണ്ടും ..

അറിഞ്ഞുകാണുമ്പോള്‍ തുച്ഛം

അറിയാതെ കാണുമ്പോള്‍ മിച്ചം

കാണുന്നതറിയുമ്പോള്‍ പുച്ഛം

നോക്കിനോക്കിക്കിടക്കുമ്പോള്‍-ഹൈക്കു 2

2008-12-01T11:48:00.000-08:00

നോക്കിനോക്കിക്കിടക്കുമ്പോള്‍
മാനം കാണാനാവാതെ
മച്ചുനോക്കിക്കിടക്കുമ്പോള്‍
നോട്ടങ്ങള്‍ക്കുമീതെ
മച്ചുവന്നുകിടക്കുമ്പോള്‍
ബാക്കികിടക്കുന്നു
ആവിഷ്കരിക്കപ്പെടാത്തൊരു മാനം

ഹൈക്കു-1

2008-11-26T12:14:00.000-08:00

മാംസനിബദ്ധമല്ലാത്ത രാഗം
മാഞ്ഞുമാഞ്ഞേ പോകുന്ന രാത്രിയില്‍
സ്വപ്നത്തിന്‍ മൃഗശാലയില്‍
മുതല, മലമ്പാമ്പ്, പുള്ളിപ്പുലി
ഇണചേര്‍ന്ന് ഉയരങ്ങളിലേക്കേ പോകും ഇരുള്‍ മരങ്ങള്‍

അളിഞ്ഞ അടിവസ്ത്രം

ഒരു ചോദ്യം [ഉത്തരമാര്‍ക്കുമാവാം ]

2008-11-10T11:39:00.000-08:00

പാതിരാത്രി
പെരുവഴിയില്‍
പട്ടികള്‍
പണിയെടുക്കുന്നതുകണ്ട്
പല്ലിറുമ്മി [കല്ലെറിയാതെ]

പുരയിലെത്തി
പൊണ്ടാട്ടിയെ ഉണര്‍ത്താതെ [ശല്യം ചെയ്യാതെ]
പ്രണയമുണ്ടായിട്ടും
പ്രാപ്യരല്ലാത്ത
പെണ്‍കുട്ടികളെയോര്‍ത്ത്
വാണമടിച്ചു
കിടന്നുറങ്ങി
ഉണരുന്നതിനെയാണോ
നാം
സാന്‍മാര്‍ഗിക ജീവിതമെന്നു പറയുന്നത്?

വിശ്വാസം-നിശ്വാസം

2008-10-30T13:36:00.000-07:00

നെല്ലിയാമ്പതിയില്‍
സീതാര്‍കുണ്ടിന്റെ നിറുകയില്‍
മഞ്ഞ് മാറിമാറി വന്ന്
മുഖം മറയ്ക്കുന്ന മധ്യാഹ്നത്തില്‍
കുരങ്ങുകള്‍ കുണ്ടില്‍ നിന്ന് കയറിവന്ന്

എട്ടാം ക്ളാസ്സിലെ

ബയോളജി പുസ്തകം

ഓര്‍മിപ്പിക്കുമ്പോള്‍

മോളേ അറ്റത്തേക്കുപോകല്ലേ എന്ന്
ഒരച്ഛനുമമ്മയും

മാറിനിന്ന് നിലവിളിക്കുമ്പോള്‍ ‍

അഞ്ചുവിരലുകളുടെ വിശ്വാസത്തില്‍
അല്പംകൂടി വിശാലമായ ലോകംകാണാന്‍

കാമുകി മുന്നോട്ടായുമ്പോള്‍

അവളുടെ വിശ്വാസം ഒന്നുമാത്രം

അസാധ്യമാക്കിയ

ഇതരവാഴ്വുകളെക്കുറിച്ചോര്‍ത്തു

അതിനടിയില്‍

കാണാതെപോയ ലോകങ്ങള്‍ പിടഞ്ഞു

ആ വിരലൊന്നയച്ച്
അവളൊടൊപ്പമുള്ള അസഹ്യമായ ജീവിതം
അവസാനിപ്പിച്ചാലോ എന്ന

ചിന്ത മതിയായിരുന്നു
എല്ലാം സഹനീയമാക്കുവാന്‍

ആവിഷ്കരിക്കപ്പെടുന്നിടത്തോളമേ
ഭയങ്ങള്‍ ഭയങ്ങളായിരിക്കുന്നുള്ളൂ

ഗൃഹാതുരം

2008-10-27T12:05:00.000-07:00

പ
ല്ലി
ട
കുത്തി
വിരല്‍
മണത്തപ്പോള്‍
കി
ട്ടി
കുട്ടിക്കാലത്തിന്റെ
സു
ഗ
ന്ധം

മുറിവ്
പഴുത്തതിന്റെ
ഗ
ന്ധം

മോശം കവിതകള്‍ എഴുതുന്നതിനെക്കുറിച്ച്

2008-10-23T13:34:00.000-07:00

മരവിപ്പിന്റെ കാലങ്ങളില്‍
പെണ്‍കുട്ടികള്‍ വന്ന്
ചില കവിതകള്‍ പറഞ്ഞുതരും

മരവിപ്പുമാറുമ്പോള്‍
ആ കവിതകളും കുട്ടികളും
അനാവശ്യമായി തോന്നും

മരവിപ്പിന്റെ കാലം
വീണ്ടും വീണ്ടും വരുമല്ലോ
മരവിപ്പിന്റെ കാലം
വീണ്ടും വീണ്ടും പോകുമല്ലോ

മരിച്ചിരിക്കുവോളം
മരച്ചിരിക്കാനാവില്ലല്ലോ

നയന്‍താര നിത്യവും നനയുകയാണ്

2008-09-27T03:54:00.000-07:00

മഴപെയ്യുമ്പോഴല്ലാതെ
ഒരു പെണ്‍കുട്ടി
കയറിവരികയും
ഇടിവെട്ടുമ്പോഴല്ലാതെ
അവള്‍
ഇറങ്ങിപ്പോകുകയും
ചെയ്തിരുന്നെങ്കില്‍

ഒരു പെണ്‍കുട്ടി
ജീവിതത്തിലേക്ക്
വരുകയും
പോവുകയും
ചെയ്യുന്നത്
തീര്‍ത്തും
നിസ്സാരമായതുകൊണ്ടല്ല
മഴപെയ്യുന്നതും
ഇടിവെട്ടുന്നതും
അത്രയും
സാധാരണമായതുകൊണ്ടാണ്‌

എന്നും നനഞ്ഞാലും കുളിരില്ല സാര്‍

ഉദ്ധാരണശേഷി

2008-09-19T05:54:00.000-07:00

ഓരോ കവിത കഴിയുമ്പോഴും
ഇനിയൊന്നിന്‌
ശേഷിയില്ലല്ലോ എന്നോര്‍ത്ത്
ആകുലപ്പെടാറുണ്ട്

അത്രമാത്രം
ക്ഷീണിക്കുന്നുണ്ട്
ഹതാശനാവുന്നുണ്ട്
ഇല്ലായ്മ ബോധ്യപ്പെടുന്നുണ്ട്

ഇഷ്ടമില്ലാഞ്ഞിട്ടല്ല
തിരിഞ്ഞുകിടക്കുന്നത്
നെഞ്ചത്തുവെച്ച
കൈയെടുത്തുമാറ്റിവെക്കുന്നത്
എന്തൊരുചൂട് എന്ന്
ആവിപ്പെടുന്നത്

എന്തൊക്കെ വാക്കുകള്‍
അവ്യക്തമായി പുലമ്പിയിട്ടാണ്‌
ചക്കരക്കുട്ടീ എന്ന്
എത്രവട്ടം വിളിച്ചിട്ടാണ്‌
ഏതൊക്കെ നിലകളില്‍
ഉന്മാദിയെപ്പോലെ
ഉലഞ്ഞിട്ടാണ്‌
ഇപ്പൊഴീ വേണ്ടായ്ക
എന്നുനീ പുച്ഛിക്കേണ്ട

നാളെ പുറത്തുവരേണ്ട ബീജം
ഇന്നേ
വാക്കുവാക്കായി
പുറപ്പെട്ടിട്ടുണ്ട്
ശരീരത്തിന്റെ
കുണ്ടനിടവഴികളിലൂടെ

പ്രണയകാലത്തെ ആത്മഗതങ്ങള്‍ ആത്മകഥനങ്ങള്‍

2008-09-06T03:52:00.000-07:00

എന്‍റെ ഏകാന്തത
എനിക്ക് മടുത്തപ്പോഴാണ്‌
ഞാന്‍ നിന്‍റെ കണ്ണുകളിലേക്ക്
നോക്കിത്തുടങ്ങിയത്
നിന്‍റെ കണ്ണുകളിലെ നീരസം
കണ്ടു മടുത്തപ്പോഴാണ്‌
ഞാന്‍ എന്നിലേക്ക്‌ തിരിച്ചുപോന്നത്
എനിക്കറിയാം എല്ലാ യാത്രകളും നിന്നിലേക്ക്‌ മാത്രമാണെന്ന്
എനിക്കറിയാം എല്ലാ യാത്രകളും എന്നില്‍ വന്നവസാനിക്കുമെന്ന്.
എത്ര സേഫ്ടിപിന്‍ ഹെയര്‍പിന്‍ വളവുകള്‍ കയറി ഇറങ്ങേണ്ടി വന്നാലും
ഈ യാത്ര തുടര്‍ന്നെ പറ്റൂ എന്ന്

6/04/2008

ഏറ്റവും മോശം പ്രണയകവിതയെഴുതിയതിന്റെ പിറ്റേന്ന് കുറേനാളായി പിന്തുടരുന്ന പ്രണയജീവിതത്തോട് വിടപറയണമെന്നുതോന്നി.മറ്റൊന്നും കൊണ്ടല്ല,ഒരു മോശം കവിത എന്റെ അനാരോഗ്യത്തെ വ്യക്തമാക്കിത്തന്നു. അതു പ്രസിദ്ധപ്പെടുത്തിയപ്പോള്‍ ഞാന്‍ കോമയിലകപ്പെട്ടതിനു തുല്യമായി. എല്ലാ പ്രണയത്തിനും അതിന്റേതായ പരിമിതികളുണ്ട്. സദാചാരപരമായ പരിമിതികളല്ല, സ്ഥാപനവത്കരിക്കപ്പെടുന്നതിന്‌ പരിമിതികളുണ്ട്. അതല്ല ഇപ്പോള്‍ എന്റെ വിഷയം,സൌന്ദര്യപരമായ ആവിഷ്കാരപരമായ പരിമിതികള്‍.
2

രണ്ടുപകല്‍ മുഴുവന്‍

ഒരു വീട് പൊളിച്ചിറക്കുന്നത്

നോക്കിക്കൊണ്ടിരുന്നു

ഓടും ഉത്തരവും നിലത്തിറക്കിയ

പണിക്കാര്‍ അറിഞ്ഞിട്ടുണ്ടാകുമോ

ഇത്രകാലവും അതിനുള്ളില്‍ കെട്ടിക്കിടന്ന നെടുവീര്‍പ്പുകള്‍

നാലുചുവരുകള്‍ക്കുള്ളില്‍ അടഞ്ഞ

ഒരു മുറി പേറിയ ഭാരങ്ങള്‍

ഈചെറിയ നഗരം എന്നെ വല്ലാതെ ബോറടിപ്പിക്കുന്നുണ്ട്

ജീവിതത്തില്‍ ഒരിക്കലും അനുഭവിച്ചിട്ടില്ലാത്ത വിധത്തില്‍

അതെന്റെ ദാരിദ്ര്യത്തെക്കുറിച്ച് ഓര്‍മപ്പെടുത്തിക്കൊണ്ടിരിക്കുന്നു

പലവട്ടം നടന്നുതീര്‍ത്ത അതിന്റെ വഴികളില്‍

പുതുതായി ഒന്നും ഉദയം ചെയ്യുന്നില്ല

ഒരു സിനിമപോലും മാറുന്നില്ല

ഒരു പുസ്തകവും പുതുതായി എത്തുന്നില്ല

എല്ലാ മരവും നിശ്ചലം

ഇലകള്‍ പൊഴിയുകയോ തളിര്‍ക്കുകയോ ചെയ്യുന്നില്ല

കോട്ടയുടെ കിടങ്ങിലെ വെള്ളം പായല്‍ മൂടി

സൂര്യന്‍ പ്രതിഫലിക്കുന്നേയില്ല

വാടികയുടെ പുല്‍മേടുകളില്‍ മഞ്ഞപ്പൂക്കള്‍ വീണ്‌ ചിതറിക്കിടപ്പുണ്ട്

കെട്ടിപ്പിടിച്ചും പൊട്ടിച്ചിരിച്ചും

നവദമ്പതിമാര്‍ വന്നുതിരക്കുന്നുണ്ട്

നൂറ്റാണ്ടുകളായി പഴകിയതുപോലെ

എല്ലാം അത്രമാത്രം പരിചിതമായിരിക്കുന്നു

മൈതാനത്തെ കുട്ടികള്‍മാത്രം

ഒരുബോളിനെ പലമട്ടില്‍ നേരിട്ട്

വിരസതയെ പ്രതിരോധിക്കുന്നുണ്ട്

ചിലപ്പോള്‍ അതിര്‍ത്തികടത്തുന്നുണ്ട്

അനാവശ്യമായ ഒരു ഷോട്ട് പക്ഷേ

അവരെയും അനന്തമായ വിരസതയുടെ

പുല്മേട്ടില്‍ തിരികെ എത്തിക്കുന്നുണ്ട്

എന്താണു പ്രണയം ?

നീ സ്ത്രീയായതിനാലാണോ

ഞാന്‍ പുരുഷനായതിനാലാണോ?

നീ സുന്ദരിയായതിനാലാണോ

ഞാന്‍ ദുര്‍ബലനായതിനാലാണോ?

രാത്രി നിലാവില്‍

കാറ്റ് ജനല്‍ തുറക്കുന്ന മുറിയില്‍

ഞാന്‍ തനിച്ചായതിനാലാണോ ?

ഒരു തണുപ്പ് വന്ന് തൊട്ടുപോകുന്നതിനാലാണോ

വെളിപ്പെടാനായിമാത്രം

വാക്കുകള്‍ വന്ന് തിരക്കുകൂട്ടുന്നതിനാലാണോ ?

എന്താണു പ്രണയം ?

നീയും ഞാനും മനുഷ്യരായതിനാലാണോ ?

ശരീരമുള്ളതിനാലാണോ ?

ചിലപ്പോള്‍ എനിക്കുതോന്നും ഞാന്‍ നിന്നെ പ്രേമിച്ചത് നീ മറ്റൊരുവന്റെ കാമുകിയായതിനാലാണെന്ന്.ഒരു സാധാരണ പെണ്‍കുട്ടി എന്നെ പ്രേമിക്കുന്നതില്‍ അസാധാരണമായി ഒന്നുമില്ല.ഞാന്‍ സുന്ദരനോ വിരൂപനോ ആയതുകൊണ്ടല്ല, അതില്‍ എന്നെ തൃപ്തിപ്പെടുത്തുന്ന ഒന്നുമില്ലാത്തതിനാലാണ്‌. നീ അവനെ പ്രേമിക്കുമ്പോള്‍ അവന്‍ നിന്നെ പ്രേമിക്കുമ്പോള്‍, നിന്റെ പ്രേമം എനിക്കുകൂടി വേണ്ടതാണെന്നു തോന്നി. അവന്‍ നിന്നെ പ്രേമിക്കുന്നതില്‍ എനിക്കു സങ്കടമില്ലാത്തതുകൊണ്ടുമാത്രം ഞാന്‍ നിന്നെ പ്രേമിക്കുമ്പോഴുള്ള അവന്റെ സങ്കടത്തെ ഞാന്‍ അവഗണിച്ചു. മറ്റൊരുവന്റെ കാമുകിയായതുകൊണ്ടുമാത്രമല്ല ഞാന്‍ നിന്നെ പ്രേമിച്ചത്, നീ സുന്ദരിയായതുകൊണ്ടുകൂടിയാണ്‌. സുന്ദരിയായൊരു പെണ്‍ കുട്ടിയെ അസുന്ദരമായൊരു ലോകത്ത് കണ്ടുമുട്ടാനിടയായാല്‍ അവളെ പ്രണയിക്കുകയല്ലാതെ മറ്റ് വഴികളില്ല. നീ സുന്ദരിയായതുകൊണ്ടുമാത്രമല്ല ഞാന്‍ നിന്നെ പ്രേമിച്ചത്‌, എന്റെ പരിമിതികള്കൊണ്ടുകൂടിയാണ്. പരിമിതികളെ മറികടക്കാന്‍ സൌന്ദര്യമല്ലാതെ മറ്റൊന്നും ഈ ഉലകത്തിലില്ലാത്തതിനാലാണ്.

കാമുകനായിരിക്കുന്നത് മറ്റൊന്നിനും വേണ്ടിയല്ല

കവിതക്കുവേണ്ടിയാണ്‌

എല്ലാകവിതകളും പെണ്‍കുട്ടികളുടെ കണ്ണുകളില്‍ നിന്ന്

മൊഴിമാറ്റിയവയാണ്

ശരീരത്തില്‍ നിന്ന് പകര്‍ത്തിയെഴുതിയവയാണ്

എന്റെ പ്രണയം

എനിക്കുവേണ്ടിമാത്രമാണെന്ന് അറിയാവുന്നതുകൊണ്ടാണ്‌

അത് നിന്നെ അറിയിക്കാതിരുന്നത്

പക്ഷെ ഒരുകാമുകന്‌

ഒറ്റയ്ക്ക് അവന്റെ പ്രണയത്തെ

എത്രകാലം കൊണ്ടുനടക്കാനാകും ?

എഴുത്തല്ലാതെ മറ്റു വിനിമയങ്ങളില്ലാതെ

കാഴ്ചയല്ലാതെ മറ്റ് വേഴ്ചകളില്ലാതെ

സ്വയംഭോഗമല്ലാതെ മറ്റു ഭോഗങ്ങളില്ലാതെ

ഒഴുകുന്ന, തെളിച്ചമുള്ള, എന്നാല്‍ ചുഴികളുള്ള

ഒരു നദിയുടെ കരയിലെന്നതുപോലെ

ഒരു മണ്ണിരയെപ്പോലും ചൂണ്ടയില്‍ കോര്‍ക്കാതെ

ഒരു കുളിയുടെ കുളിരുപോലും സ്മരണയിലില്ലാതെ

ഒറ്റക്ക് അവന്റെ പ്രണയത്തെ കൊണ്ടുനടക്കാനാകുമോ

അവളുടെ നിഷേധത്തെ പുണരാനാവുമോ

അവളുടെ അമര്‍ഷത്തില്‍ അലിയാനാവുമോ

പ്രണയമുണ്ടാവുകയും പ്രണയിക്കുന്നവള്‍

ശരീരം കൊണ്ട് അപ്രാപ്യയായിരിക്കുകയും ചെയ്യുന്ന അവസ്ഥയില്‍

ഒരുവന്‌ എത്രകാലം ജീവിക്കാം ?

മുഖത്ത് വികാരങ്ങള്‍ ‍ഓളങ്ങള്‍പോലെ ഒളിമിന്നിക്കൊണ്ടിരിക്കുന്ന

ഒരു പെണ്‌കുട്ടിയെ വെറുതെ നോക്കിക്കൊണ്ടിരിക്കാനാവുമോ

പുലരിവെളിച്ചത്തില്‍ കാടുകാണുന്നതുപോലെ

അന്തിവെളിച്ചത്തില്‍ തിരകളുള്ള കടല്‍ കാണുന്നതുപോലെ

ഇടക്ക് ചില ചിറകനക്കങ്ങളോടെ രണ്ട് ശലഭങ്ങള്‍

ഇണചേരുന്നത് കാണുന്നതുപോലെ

മുട്ടിലിഴയാന്പോലുമാവാത്ത ഒരു കുഞ്ഞ്

ഉടലനക്കങ്ങള്‍ കൊണ്ടുമാത്രം

വാതില്‍ വെളിച്ചത്തിലേക്കു നീന്തുന്നതുകാണുന്നതുപോലെ

വെറുതെ ഒരുവളെ നോക്കിയിരിക്കാനാകുമോ

തനിച്ചാവുന്നവന്റെ കരച്ചിലുകള്‍ ചിരിക്കലുകള്‍

ആരുകേള്‍ക്കും

ഈലോകം എത്ര വിരസമെന്ന്, ചിലപ്പോള്‍ സരസമെന്ന്

ആരെ പുണര്‍ന്നുകൊണ്ട് പറയും

ചുണ്ടുകള്കൊണ്ടുമാത്രം എഴുതാന്‍ കഴിയുന്ന ചില കവിതകള്‍

ഇണചേരുമ്പോള്‍ മാത്രം സാധ്യമാവുന്ന ചില പടവുകള്‍

എല്ലാം എത്രകാലം എഴുത്തുകൊണ്ടുമാത്രം പകരം വെക്കും

ഞാന്‍ നിന്നോട് വിചിത്രമായൊരു കഥപറയാം. വര്‍ഷങ്ങള്‍ക്കുമുമ്പ് ഞാനൊരു പെണ്‍കുട്ടിയെ പ്രേമിച്ചു.അവളെ മടുത്തപ്പോള്‍ അവളുടെ ഈഗോക്ക് പാത്രമായ വിവാഹിതയായ അവളുടെ കൂട്ടുകാരിയെ പ്രേമിച്ചു.കുറേക്കഴിഞ്ഞപ്പോള്‍ എന്റെ ഈഗോക്ക് പാത്രമായ എന്റെ സുഹൃത്തിനെ അവള്‍ പ്രേമിച്ചു. എന്റെ കാമുകി അവളുടെ ഭര്‍ത്താവിനെ പ്രേമിച്ചു. ഈസമയത്ത് എന്റെ സുഹൃത്തിന്റെ കാമുകി എന്നെ പ്രേമിച്ചു.എനിക്കപ്പോള്‍ മറ്റൊരുവളോട് പ്രണയം തോന്നി. അവള്ക്കും കാമുകനുണ്ടായിരുന്നു അവനും സുഹൃത്തുക്കളുണ്ടായിരുന്നു. ആ സുഹൃത്തുക്കള്ക്കും കാമുകിമാരും ഭാര്യമാരും സുഹൃത്തുക്കളുമുണ്ടായിരുന്നു. ഈ കഥ ഇങ്ങനെ എത്രവേണമെങ്കിലും നീണ്ടുപോകാം.ഈ കഥ വിചിത്രമെന്ന് ആദ്യം പറഞ്ഞത് എന്റെ ഒരുതെറ്റാണ്‌.പ്രണയം ചിലപ്പോള്‍ നാട്ടുവഴികള്‍പോലെ വിചിത്രവും ചിലപ്പോള്‍ നഗരവീഥികള്‍പോലെ സുന്ദരവുമാണ്‌.ഞാന്‍ അവിശ്വസിക്കുന്നത്‌ പ്രണയത്തെയോ സൌഹൃദത്തെയോ ബന്ധങ്ങളെ മുഴുവനായോ അല്ല. വിശ്വാസം എന്ന വാക്കിനെത്തന്നെയാണ്‌.

നിന്നെ ഞാന്‍ കണ്ടെത്തും വരെ

ഞാന്‍ വൈകുന്നേരങ്ങളില്‍

സുഹൃത്തുക്കളോടൊത്ത് നടക്കാന്‍ പോയി

അമ്പലത്തിന്റെ മുന്നിലിരുന്ന്

പെണ്‍കുട്ടികളുടെ മുന്നും പിന്നും ദര്‍ശിച്ചു

മുത്തോ മുത്തുച്ചിപ്പിയോ വാങ്ങി മടങ്ങി

ഇപ്പോള്‍ ഞാന്‍ നിന്നെ പ്രേമിക്കുന്നു

പട്ടിയെപ്പോലെ ചുരുണ്ടുകൂടി എന്റെ ജീവിതം കിടക്കുന്നു

നിന്നില്‍ സംത്രുപ്തനായിക്കൊണ്ട്

[1 കമലാദാസിന്റെ പ്രേമം എന്ന കവിതയെ അനുകരിച്ചെഴുതിയത്‌]

പള്ളിപ്പെരുന്നാളിന്റെ രാത്രിയില്‍

കതിനമുഴക്കങ്ങളുടെ പശ്ചാത്തലത്തില്‍

വലിച്ചുകെട്ടിയ ഡബിള്‍ മുണ്ടില്‍

ജീസസ് പടം തുടങ്ങുന്നതിനുമുമ്പുള്ള ആകാംക്ഷയുടെ ഇടവേളയില്‍

പള്ളിക്കൂടമുറ്റത്ത് ബലൂണ്‍ തട്ടി നടന്നിരുന്ന

ആളൊഴിഞ്ഞ നേരത്ത്

പെണ്‍ കുട്ടികളുടെ മൂത്രപ്പുരയുടെ ചുമരിലെ പച്ചപ്പായല്‍ ചുരണ്ടി

ഹൃദയം തുളച്ചുകയറുന്ന അമ്പിന്റെ

-അതോ യോനി തുളച്ചുകയറുന്ന ലിംഗമോ-?

ചിത്രം വരച്ച

ഒരിക്കലും മടങ്ങിവരികയോ

അടിച്ചുവരികയോ ചെയ്യാത്ത കവിതകള്‍ക്കായി

ആഴ്ചപ്പതിപ്പുകള്‍ മാറിമാറി പരതിക്കൊണ്ടിരുന്ന

വീട്ടിലുള്ള ദിവസങ്ങളില്‍

അച്ഛാ കോഴിയെ നോക്കണെ പൂച്ചക്ക് ചോറുകൊടുക്കണേ എന്ന്

അവളുടെ അമ്മയെ അനുകരിച്ച് പറഞ്ഞ്

അങ്കണവാടിയിലേക്ക് പോകുന്ന

മൂന്നരവയസ്സുകാരിയെ ഓര്‍മിച്ചിരിക്കുന്ന

കാലത്തില്‍ നിന്ന്

ഒരു തരി നിന്റെ കണ്ണില്‍ വീണുകിടപ്പുണ്ട്

എത്രകണ്ടിട്ടും മതിവരാതെ

തമസ്കരിച്ചിട്ടും തികട്ടാതെ

ഞാന്‍ നിന്നെ നോക്കിക്കൊണ്ടിരിക്കുന്നത്‌ മറ്റൊന്നും കൊണ്ടായിരിക്കില്ല

ഈയിടെയായി കണ്ണുകള്‍ കവിതയില്‍ കൂടുതലാണല്ലോ എന്താ വല്ല കണ്ണിലും കുടുങ്ങിയോ എന്നുചോദിച്ച വായനക്കാരിയോട് കെട്ടിക്കിടക്കുന്നവന്റെ കവിത കാല്‍പനികമാകാതെ തരമില്ല ദുഷിക്കാതെയും തരമില്ല എന്നുപറഞ്ഞൊഴിഞ്ഞു.

ഉറങ്ങുമ്പോള്‍ ഉറങ്ങുന്നത് ഉറങ്ങുന്നവന്‍ മാത്രമല്ല

ഉണരുമ്പോള്‍ ഉണരുന്നത്‌ ഉണരുന്നവന്‍ മാത്രമല്ല

ഉലകം മുഴുവന്‍ അവനോടൊപ്പം ഉറങ്ങുകയും ഉണരുകയുമാണ്‌

എന്നൊടൊപ്പം ഉറങ്ങിപ്പോയ ലോകത്തെക്കുറിച്ച് എനിക്കു പരാതികളില്ല. എന്നൊടൊപ്പം ഉണര്‍ന്ന ലോകത്തിലേക്ക് എനിക്ക് വീണ്ടും ഉണരേണ്ടതുണ്ട്. പുറപ്പെട്ടേടത്തുതന്നെ എനിക്കു തിരിച്ചെത്തേണ്ടതുണ്ട്. പുറപ്പെട്ട ആളായിത്തന്നെ തിരിച്ചെത്തണമെന്ന നിര്‍ബന്ധമില്ലാതെ

വിന്യാസം

2008-08-23T13:11:00.000-07:00

ഒരിക്കല്‍

എല്ലാവരേയുംപോലെ

നിന്നെ

കാണുന്നതിനുവേണ്ടിമാത്രം

ഞാന്‍

നിന്റെ
കണ്ണുകളിലേക്കു

നോക്കിക്കൊണ്ടിരുന്നു

മറ്റൊരിക്കല്‍

എല്ലാവര്‍ക്കും

സംഭവിക്കുന്നതുപോലെ

എന്നെ

കാണുന്നതിനുവേണ്ടിമാത്രം

ഞാന്‍

നിന്റെ

കണ്ണുകളിലേക്കു

നോക്കിക്കൊണ്ടിരുന്നു

എത്ര കണ്ണാടികള്‍

ചേര്‍ത്തുവെച്ചാലും

എത്ര ചേര്‍ന്ന്

നാം നിന്നാലും

എന്നെയും നിന്നെയും

ഇതേ താളത്തില്‍

ഇതേ അളവില്‍

മറ്റെവിടെയും

കാണാനാവില്ലെന്നതുകൊണ്ട്

ഞാന്‍

വീണ്ടും

നിന്റെ കണ്ണുകളിലേക്കുതന്നെ

നോക്കിക്കൊണ്ടേയിരിക്കുന്നു

നോ

ക്കി

ക്കൊ

ണ്ടേ

യി

രി

ക്കു

ന്നു

പകലുകളുടെ രാത്രികള്‍

2008-08-19T00:24:00.000-07:00

നീ അടുത്തില്ലാത്ത
പകലുകളുടെ രാത്രികളില്‍

വെളിച്ചം
നിഴലായിമാത്രം
വീണിട്ടുള്ള
വഴികളിലൂടെ
നിന്നെ ഓര്‍മിച്ച്
നടക്കുമ്പോള്‍

ഒരു കാറ്റ്
എതിരെ വന്ന്
എന്നെ പൊതിഞ്ഞ്
ഒന്നുതണുപ്പിച്ച്
കടന്നുപോകുമ്പോള്‍

വഴിയരികിലെ
ഒറ്റമരം
തനിച്ചാണെന്നുകരുതി
തലകുലുക്കി
വെറുതെ
കുശലം പറയാനൊരുങ്ങുമ്പോള്‍

ഒരു പട്ടി
വന്ന്‌
നിന്ന്
കുരച്ച്
മണത്ത്
സംശയം മാറാതെ
പോകാനൊരുങ്ങുമ്പോള്‍

ചീവീടുകളുടെ
നീട്ടിനീട്ടിയുള്ള
നിലയ്ക്കാത്ത
നിലവിളിക്ക്
ഒരുനിമിഷം നിന്ന്
ചെവികൊടുക്കുമ്പോള്‍

ഒരു പോലീസുവണ്ടി
ചവിട്ടിനിര്‍ത്തി
ആരാ
എന്താ
ഈനേരത്ത് തനിച്ച്
എങ്ങോട്ടാ
എന്നൊക്കെ
ചോദ്യം ചെയ്ത്
കണ്ണുരുട്ടി
വിറപ്പിച്ച്
ഇരപ്പിച്ച്
പോകുമ്പോള്‍

നിന്റെ
കളി
ചിരി
വിഷാദം
ചിലനേരങ്ങളിലെ
കരച്ചില്‍
മുഷിച്ചില്‍
ദേഷ്യം
ഇങ്ങനെ
ഒന്നൊന്നായി
എന്റെ
ശരീരത്തിലൂടെ
കടന്നുപോകുമ്പോള്‍

നീ അടുത്തില്ലാത്ത
പകലുകളുടെ രാത്രികളില്‍
നിന്നെ ഓര്‍മിച്ച് നടക്കുമ്പോള്‍ .....

കാമുകി

2008-08-11T13:05:00.000-07:00

എന്റെ
പേടികള്‍കൊണ്ട്
ഊതിവീര്‍പ്പിച്ച
ഒരു ബലൂണ്‍മാത്രമാണ്‌
നീ യെന്നറിയാഞ്ഞിട്ടല്ല

പക്ഷെ

നീ പൊട്ടുമ്പോള്‍
ചിതറുന്നത്
ഞാനാണല്ലോ

ഒരു വാക്ക്

2008-08-07T12:41:00.000-07:00

പ്രിയപ്പെട്ട ഒരാളോട്

പ്രിയമുള്ള നിമിഷങ്ങളില്‍

ആരും ഒരിക്കലും

പറഞ്ഞിട്ടില്ലാത്ത

ഒരു വാക്ക്

നിന്നോടുപറയണമെന്ന്

ഈദിവസങ്ങളില്‍

ചിലപ്പോഴെങ്കിലും

ഞാന്‍ ആഗ്രഹിക്കാറുണ്ട്.

മുന്‍വിധികളാല്‍ മലിനമാകാത്ത

ആദര്‍ശങ്ങളാലോ വികാരങ്ങളാലോ വഴിതെറ്റാത്ത

അര്‍ഥങ്ങളിലേക്കോ അനര്‍ഥങ്ങളിലേക്കോ നയിക്കാത്ത

വ്യവസ്ഥയോ അവ്യവസ്ഥയോ ഉണ്ടാക്കാത്ത

ഒരു പുഴപോലെ

എനിക്കും നിനക്കുമിടയില്‍

നിശ്ശബ്ധമായി ഒഴുകിക്കൊണ്ടിരിക്കുന്ന

ഒരു പാലം പോലെ

എന്നിലേക്കും നിന്നിലേക്കും

വരാനും പോകാനും കഴിയുന്ന

ഒരു വാക്ക്.

പച്ചിലകള്‍ക്കുനടുവില്‍

ഒരുപൂമാത്രം ചൂടി നില്ക്കുന്ന

കുന്നിന്ചെരുവിലെ

ഏകാകിയായ

ഒറ്റമരംപോലെ

ആഒരു വാക്കുകൊണ്ട്

എനിക്ക്

നിന്റെ മുമ്പില്‍ വെളിപ്പെടണം.

എന്റെ പ്രേമം പറയുന്നതിനോ

നിന്റെ പ്രേമം നേടുന്നതിനോ അല്ല

അത്രയും ആഴത്തിലുള്ളൊരു അനുഭവത്തിനും

വിനിമയം സാധ്യമാണെന്ന്

തെളിയിക്കുന്നതിനുവേണ്ടിമാത്രം

പടപേടിച്ച്...

2008-08-04T22:59:00.000-07:00

തലയ്ക്കുപിടിച്ച

പ്രേമവുമായി

പാതിരയ്ക്ക്

പുരയിലേക്കുപോയവന്റെ

കാലില്‍ കടിച്ച

പാമ്പിനെക്കുറിച്ച്

എന്തുപറയാന്‍!

വിഷം

കാലില്‍നിന്ന് തലയിലേക്കുകേറിയിട്ടുണ്ടാകുമോ

തലയില്‍നിന്ന് കാലിലേക്കിറങ്ങിയിട്ടുണ്ടാകുമോ?

കടികൊണ്ടവനിപ്പോഴും ജീവിച്ചിരിക്കുന്നു

കടിച്ച പാമ്പ് ചത്തിട്ടുണ്ടാകുമോ?

വചനം മാംസമായി...

2008-08-01T05:23:00.000-07:00

പണി തീരാത്ത
കവിതയുമായി
ഉറങ്ങാന്‍
കിടക്കരുത്

അടഞ്ഞ കണ്ണുകള്‍ക്കുകീഴെ
പുകഞ്ഞുകൊണ്ടേയിരിക്കും
പകലിന്റെ
പലതരം
പുകിലുകള്‍

ഉറക്കത്തിലും
ഉണര്‍ന്നുകൊണ്ടേയിരിക്കും
വാക്കുകളും
വരികളും

പെണ്‍വാണിഭത്തിലെ
പ്രതികളെ
പിടികൂടാന്‍
വൈകീട്ട്
മുതലക്കുളത്തുകൂടിയ
സാംസ്കാരിക
സംഗമത്തില്‍നിന്ന്
വാണിഭം ചെയ്യപ്പെട്ട
പെണ്‍കുട്ടിമാത്രം
കയറിവന്നെന്നിരിക്കും
അവള്‍ക്ക്
ഒരിക്കല്‍കൂടി
പിഴച്ചെന്നുമിരിക്കും

ഉറക്കം
ഒരു വല്ലാത്ത
സംഗതിയാണ്‌
അതിന്‌ നെരോ
നെറിവോ
ഇല്ല
സദാചാരം തീരെയില്ല
സെന്‍സര്‍ബോര്‍ഡോ
സൈന്‍ബോര്‍ഡോ
ഇല്ല
അജിതയോ
അന്വേഷിയോ
ഇല്ല
അകത്തുള്ളതെല്ലാം
അതെടുത്തു
പുറത്തിടും
കുഴിച്ചിട്ടതെല്ലാം
കിളിര്‍ത്തുപൊന്തും
കാടടച്ച വെടിയെല്ലാം
കുഴലിലേക്ക്
കിതച്ചെത്തും

രാവിലെ
ഉറക്കമെണീക്കുമ്പോള്‍
ഉടുമുണ്ടിനകത്ത്
കുഴഞ്ഞരൂപത്തില്‍
കിടക്കുന്നുണ്ടാകും
കവിതയുടെ
കോടി ബീജങ്ങള്‍

നീ ശ്വാസം

2008-07-24T12:45:00.000-07:00

ഞാന്‍ ശ്വസിക്കുന്നത്
നിന്റെ
കണ്ണുകളില്‍ നിന്നാണ്‌

കിതപ്പോ
കഴപ്പോ കൊണ്ടല്ല
പ്രണയമോ
പ്രണയരാഹിത്യമോ അല്ല

വാക്കുകൊണ്ടുള്ള കൂട്ട്
ഈ ദിവസങ്ങളില്‍
അത്രക്കും
അനിഷ്ടകരമായതുകൊണ്ടുമാത്രം

വിസ്താരവ്യാധി

2008-07-23T12:49:00.000-07:00

കവികളും
വില്ലന്‍മാരും
വിജയിക്കാത്തതെന്തുകൊണ്ട് ?
[വിജയിച്ച കവികള്‍ ക്ഷമിക്കുക]

ഒറ്റുന്നത്
മറ്റാരുമല്ല
വാക്കുകള്‍ തന്നെ

വിസ്തരിക്കാന്‍
പോയതുകൊണ്ടാണ്‌
ബലാത്സംഗം
വൈകിയത്
നായകനെത്തിയത്

ഈയിടെയായി കണ്ണടയ്ക്കാതെ കവിത വരുന്നില്ല

2008-07-20T12:58:00.000-07:00

ഞാന്‍ നോക്കുന്നത്
എന്റെ കണ്ണുകൊണ്ടാണെങ്കിലും
എന്റെ ശരീരം മുഴുവന്‍
നിന്നെ ആഗ്രഹിക്കുന്നുണ്ട്

ഞാന്‍ നോക്കുന്നത്
നിന്റെ കണ്ണിലേക്കാണെങ്കിലും
നിന്റെ ശരീരം മുഴുവന്‍
ഞാന്‍ ആഗ്രഹിക്കുന്നുണ്ട്

എങ്കിലും
എന്റെ കണ്ണും
നിന്റെ കണ്ണും
കൂട്ടിമുട്ടുന്ന ആ നിമിഷം
എന്റെ ശരീരവും
നിന്റെ ശരീരവും
എവിടെയോ
വിസ്മരിക്കപ്പെടുന്നുണ്ട്

എന്റെ ശരീരവും
നിന്റെ ശരീരവും
കൂട്ടിമുട്ടുന്ന
ആ നിമിഷം
എന്റെ കണ്ണുകളും
നിന്റെ കണ്ണുകളും
അത്രതന്നെ
അനാവശ്യവുമായിത്തീരുന്നുണ്ട്

കാതല്‍ എന്റാല്‍ എന്നാ?

2008-07-15T13:03:00.000-07:00

പകലുറക്കത്തില്‍
സ്വപ്നത്തില്‍
ഒരു പെണ്‍കുട്ടി പ്രത്യക്ഷപ്പെട്ടു

രാവിലെ
വായിച്ചുവലിച്ചെറിഞ്ഞ
പത്രത്തില്‍
അവള്‍ തൂങ്ങിച്ചത്ത
വാര്‍ത്തയുണ്ടായിരുന്നു

കാമുകന്റെ കൂടെ ഒളിച്ചോടിയെന്നും
പീഡിപ്പിക്കപ്പെട്ടുവെന്നും
ഉപേക്ഷിക്കപ്പെട്ടുവെന്നും
പലമട്ടില്‍
വാര്‍ത്തതുടരുന്നുണ്ടായിരുന്നു

പ്രണയിച്ചു
എന്ന തെറ്റാണോ
ഞാന്‍ ചെയ്തത്
അവള്‍ ചോദിച്ചു
പ്രണയം ഒരു തെറ്റല്ല
പക്ഷെ പ്രണയം
മറ്റുപലതുമാണെന്നുകരുതിയത്
വലിയ തെറ്റാണ്‌
നിന്റെ തെറ്റിലുപരി
നിന്നെ വളര്‍ത്തിയ
ലോകത്തിന്റെ തെറ്റ്

നേരത്തെ എഴുതിത്തയാറാക്കിയ
പ്രണയത്തിന്റെ മാനിഫെസ്റ്റോ
ഞാനവളെ
വായിച്ചുകേള്‍പ്പിച്ചു

പ്രണയം
കെട്ടിപ്പൊറുക്കുന്നതിനോ
കുട്ടിയെപ്പേറുന്നതിനോ
കൂട്ടുകാരിയുടെമേല്‍ കുതിരകയറുന്നതിനോ ഉള്ള
ആമുഖമല്ല
പരിചിതരോ
അപരിചിതരോ ആയ
രണ്ടുമനുഷ്യര്‍ക്കിടയില്‍
ഒരു സുപ്രഭാതത്തില്‍
സ്നേഹം വന്നുദിച്ചതിന്റെ
അടയാളവുമല്ല
പ്രണയത്തിന്‌
സൌന്ദര്യപരമായല്ലാതെ
മറ്റൊരുമൂല്യവുമില്ല
ഭോഗിക്കുക/ഭോഗിക്കപ്പെടുക
എന്നതുമാത്രമാണതിന്ടെ
ഒരേയൊരു ലക് ഷ്യം

ഇണചേരുന്നത്
ഇണചേരുന്നതിനുവേണ്ടി മാത്രമാണ്‌
തുണയാകുന്നതിന്റെ പ്രശ്നം
അതില്‍ ഉദിക്കുന്നേയില്ല

മാനിഫെസ്റ്റോ
ഇങ്ങനെ തുടരുന്നതിനിടയില്‍
സ്വപ്നത്തിന്റെ ബാല്‍ക്കണിയിലിരുന്ന്
ഇതെഴുതിയവന്‌
അമ്മയും പെങ്ങമ്മാരുമില്ലെ എന്ന
പതിവുചോദ്യമുയര്‍ന്നു
നീയും നിന്റെ അച്ചനും കുടിച്ചത്
ഒരേമുലതന്നെയാണെന്ന്
അവനോടു പറഞ്ഞപ്പൊഴേക്കും
ഉണര്‍ന്നു

സാമൂഹ്യപാഠം

2008-07-10T13:24:00.000-07:00

പള്ളിയുടെ മുന്‍പില്‍,
വണ്ടിയിലിരുന്ന കൈയ്യെടുത്ത്
കുരിശുവരച്ച
ബൈക്ക് യാത്രക്കാരനെ
എതിരെവന്ന ലോറി
ഇടിച്ചുവീഴ്ത്തി

പാഠങ്ങളില്‍നിന്ന്
പഠിക്കാതിരുന്നതിനാല്‍
ശ്രദ്ധപതിയേണ്ടത്
പള്ളിയിലല്ല
പരിസരത്താണ്‌ എന്ന്
ദൈവം
ഒരടികൊടുത്ത്
പഠിപ്പിച്ചതാകുമോ ?

രണ്ടുതുള്ളിയുടെ ആധി

2008-07-03T13:52:00.000-07:00

ദേഹംപുഴക്കുന്ന

വാക്കിന്റെ ചുഴലിയെ

ഒന്നരയിഞ്ചിന്റെ

കോലുകൊണ്ട്

എങ്ങനെ

കടയും ഞാന്‍ ?

കവനം

2008-06-30T13:14:00.000-07:00

കാഴ്ചയുടെ

അങ്ങേക്കോണുവഴി കയറി

ഇങ്ങേക്കോണുവഴി ഇറങ്ങി

ഒരു പെണ്‍കുട്ടിപോകുമ്പോള്‍

ശരീരത്തിന്റെ

അക്ഷാംശങ്ങളിലും രേഖാംശങ്ങളിലും

വാക്കുകള്‍ വന്ന് തിരക്കുകൂട്ടുമ്പോള്‍

സ്ഖലനത്തിന്‌

കവിതയല്ലാതെ

മറ്റു പോംവഴികളില്ല സുഹ്രുത്തേ

കവിയല്‍

2008-06-18T13:39:00.000-07:00

കഴുത
കാമം
കരഞ്ഞുതീര്‍ക്കുന്നു
കവി
കാമം
കവിഞ്ഞുതീര്‍ക്കുന്നു

അ.....ഇ

2008-06-11T12:58:00.000-07:00

സര്‍ ,
ജീവിതത്തെക്കുറിച്ചുള്ള
താങ്കളുടെ ഉത്കണ്ടകള്‍
താങ്കള്‍ പറയാതെതന്നെ
എനിക്കു മനസ്സിലാകുന്നുണ്ട്
-താങ്കളുടെ ജീവിതം
അതു തെളിയിക്കുന്നുണ്ടല്ലോ-

അതുകൊണ്ട്
ദയവുചെയ്തു പറയരുതേ
അതു തെറ്റാണ്‌
ഇതു ശരിയാണ്‌
അതു ചെയ്യരുത്
ഇതു ചെയ്യൂ എന്നിങ്ങനെ

ജീവിതത്തെക്കുറിച്ചുള്ള
എന്റെ ഉത്കണ്ടകള്‍
ഞാന്‍ പറയാതെതന്നെ
താങ്കള്‍ക്കും
മനസ്സിലാകുമായിരുന്നെങ്കില്‍
നമുക്ക് അങ്ങനെയും
ഇങ്ങനെയുമൊക്കെ
കഴിഞ്ഞ് പോകാമായിരുന്നു

ബാഷ്പീകരണം

2008-05-28T13:42:00.000-07:00

എഴുത്ത്
ഉരുകലാണ്‌
ഉള്ളുരുകല്‍
മഞ്ഞുരുകല്‍

മൌനം
മടക്കമാണ്‌
ഉള്ളിലേക്ക്
മഞ്ഞിലേക്ക്

എഴുത്തിലോ
മൌനത്തിലോ
സംഭവിക്കാത്ത
ചിലതുണ്ട്

അടുപ്പ മടുപ്പ...

2008-05-22T14:18:00.000-07:00

നാമിങ്ങനെ
എപ്പോഴും
ചേര്‍ന്നുനിന്നാല്‍
ഞനെങ്ങനെയാണ്‌
നിന്നെ വായിക്കുക
നീയെങ്ങനെയാണ്‌
എന്നെ വായിക്കുക

നീയല്ലാത്തലോകം
നീയില്ലാത്തലോകം
ഞാനെങ്ങനെ അറിയും
ഞാനല്ലാത്ത ലോകം
ഞാനില്ലാത്ത ലോകം
നീയെങ്ങനെ അറിയും

അടുപ്പത്തിലെത്രയനിവാര്യമകലം
[മടുക്കുമ്പോള്‍ മാത്രമുദിക്കും വിവേകം]

പുതുചൊല്ല്

2008-05-19T13:11:00.000-07:00

താന്‍ പാതി
ദൈവം പൂതി

ശബ്ദിക്കരുത്! കവി കുപ്പായത്തിന്റെ അളവെടുക്കുകയാണ്

2008-05-12T12:52:00.000-07:00

എഴുതാനിരിക്കാറുള്ള മുറിയിലാണ്‌
കുട്ടിയുണ്ടായപ്പോള്‍
തൊട്ടില്‍ കെട്ടിയത്

അവളുടെ അമ്മ
അടുക്കളയിലേക്കോ
അയലത്തേക്കോ
അലക്കിലേക്കോ
തിരിയുമ്പോള്‍
കുട്ടിയെനോട്ടമെന്നവ്യാജേനയാണ്‌
ഇപ്പോള്‍ എഴുത്ത്

ഒരുകയ്യില്‍ തൊട്ടില്‍ക്കയറുപിടിച്ച്
മറുകയ്യില്‍ പേനയുറപ്പിച്ച്
ശബ്ദമുണ്ടാക്കാതെയാണിരിപ്പ്

പേനയുടെ അടപ്പൂരുന്ന
പേജുമറിക്കുന്ന
എഴുത്തുപലക മേശയിലേക്കുചാരുന്ന
ചെറിയശബ്ദം മതി
കുട്ടിയുണര്‍ന്ന്‌
വലിയ ശബ്ദമുണ്ടാക്കാന്‍
എഴുത്തിന്റെ ഏകാഗ്രത
തകിടം മറിയാന്‍

കുട്ടിയേയും തൊട്ടിലിനേയും പ്രതീകങ്ങളാക്കി
ഉറക്കുന്നതോ ഉണര്‍ത്തുന്നതോ കവിത എന്ന
പണ്ടേ തര്‍ക്കിച്ചുപോരുന്ന
വലിയതെന്നൊക്കെ പറയുന്ന
ചോദ്യത്തിലേക്കാണ്‌
ഈ കവിത പൊയ്ക്കൊണ്ടിരിക്കുന്നത് എന്ന്
കാവ്യാനുശീലനമുള്ള വായനക്കാര്‍
മനസ്സിലാക്കിക്കാണും

നമ്മുടെ കവിതയുടെ ഏകതാനതയില്‍ മടുത്ത്
അതിന്ടെ പതിവുരൂപങ്ങളിലകപ്പെട്ട്
ബിംബകല്‍പ്പനകളെ ഭയന്ന്
ആദര്‍ശവത്കരണങ്ങളില്‍ ആണ്ട്,
മുഷിഞ്ഞ്
ഈ കവിത
ഇവിടെ
അവസാനിപ്പിച്ചിരുന്നു മുന്‍പ്

മലയാളം മാഷമ്മാര്‍
ഉപമയോ ഉത്പ്രേക്ഷയോ പഠിപ്പിക്കുന്നതിലല്ല
കവികള്‍
രൂപകങ്ങള്‍ ചമയ്ക്കുന്നതിലല്ല

കുപ്പായത്തിന്റെ നിറം മാറിയവനെ
മുടിനീട്ടിവളര്‍ത്തിയവനെ
ഓച്ഛാനിച്ചു നില്‍ക്കാത്തവനെ
കമന്റടിച്ചവനെ
എഴുത്തച്ചന്‍ ആരുടെ അച്ഛനാണെന്ന് ചോദിച്ചവനെ
ആര്‍ത്തവചക്രം എന്തുചക്രമാണെന്നു സംശയിച്ചവനെ
പുറത്തുനിര്‍ത്തി
ആ തൊഴുത്തില്‍
കവിക്ക് പുല്ലിട്ടുകൊടുക്കുന്നതിലാണ്‌
എന്റെ അമര്‍ഷം

ധിം

2008-05-10T12:54:00.000-07:00

ജീവിതം
ഈവിധം
ഒരുവിധം

ധിം

വിശ്വാസം

2008-05-08T13:37:00.000-07:00

വിശ്വാസം
മനുഷ്യനിലായാലും
ദൈവത്തിലായാലും
എല്ലാവര്‍ക്കും
നല്ലതാണ്‌
വിഡ്ഡികള്‍ക്ക്
സ്വയം ആശ്വസിക്കുന്നതിനും
വിവേകികള്‍ക്ക്
വിവരദോഷികളെ
സമാശ്വസിപ്പിക്കുന്നതിനും

മാറ്റം

2008-05-06T12:59:00.000-07:00

കുപ്പായം മാറ്റുന്നതിനൊപ്പം
കുപ്പിവളയും കമ്മലും
മാറ്റിക്കൊണ്ടിരുന്ന പെണ്‍കുട്ടി
ഒരുദിവസം നോക്കുമ്പോള്‍
കുപ്പിവളക്കാരനെ കണ്ടില്ല
ഒരുതിര അവനും അവനിരുന്ന കല്ലും
എടുത്തുമാറ്റിയിരുന്നു

പല്ലുകള്‍

2008-05-03T13:38:00.000-07:00

പുലര്ച്ചക്കെണീറ്റ്
പല്ലുതേക്കാന്‍ പരതുമ്പോഴാണ്‌
കഴുത്തിനുമീതെ
തലയില്ലന്ന് മനസ്സിലായത്

വിഷമിക്കേണ്ടിവന്നില്ല
ഉടലിനുമേലെയുള്ള
വലിയ ദ്വാരത്തിന്‍മേല്‍
നിരതെറ്റാതെ നിന്നിരുന്നു പല്ലുകള്‍

പ്രണയത്തിന്റെ രക്തസാക്ഷി

2008-04-30T13:45:00.000-07:00

പ്രണയത്തില്‍ കുടുങ്ങിയവരെ
കല്യാണത്തില്‍ അകപ്പെടുത്താന്‍
ജീവിതം കളഞ്ഞ
പള്ളിപ്പാതിരിയല്ല

കാമുകിയുടെ വിവാഹദിവസം
കഴുത്തില്‍ വരണമാല്യവുമായി
കെട്ടിത്തൂങ്ങിച്ചത്ത
കവിയല്ല

ചാരിത്രത്തിന്റെ ചൂണ്ടയില്‍ കുടുങ്ങി
കടാപ്പുറത്ത്
മീനുകളെപ്പോലെ ചത്തടിഞ്ഞ
കറുത്തമ്മയോ പരീക്കുട്ടിയോ അല്ല

കുളിമുറിയില്‍
അവളെയോര്‍ത്തുള്ള
സ്വയംഭോഗത്തിന്റെ മൂര്‍ച്ഛയില്‍
സ്വന്തം ശുക്ലത്തില്‍ ചവുട്ടി
തലയടിച്ച്
വീണുമരിച്ചവനാണു
പ്രണയത്തിന്റെ ശരിയായ രക്ത-ശുക്ലസാക്ഷി

അത്രമാത്രം

2008-04-24T13:33:00.000-07:00

വൈകുന്നേരത്തെ
ഈ പതിവുനടത്തം
ആരോഗ്യരക്ഷയ്ക്കാണെന്ന്
മാന്യന്മാര്‍
തെറ്റിദ്ധരിക്കരുത്

പെണ്കുട്ടികളുടെ
മുലകളിലേക്ക്
കുറ്റബോധം കൂടാതെയുള്ള
നോട്ടത്തിനുള്ള
ഒരു പരിശീലനം
അത്രമാത്രം

പണ്ണ്‌

2008-04-21T13:44:00.000-07:00

ഒരു പെണ്ണിനെ വേണമായിരുന്നു
തെറ്റിദ്ധരിക്കരുത്
പെണ്‍ വാണിഭം നടത്താനല്ല
പെണ്ണുകെട്ടി പൊറുപ്പിക്കാനല്ല
പണ്ണി പറഞ്ഞയക്കാനുമല്ല
നമ്മുടെ മമ്മൂട്ടിയണ്ണന്റെ പടത്തിന്
ഫസ്ട്ഡെ ഫസ്ട്‌ ഷോയ്ക്ക്
രണ്ടുടിക്കറ്റെടുക്കാനാണ്

ദൈവത്തിന്റെ കളി

2008-04-12T12:56:00.000-07:00

പുലര്‍ച്ചക്ക്
കിളികളുടേയും
അമ്പലത്തില്‍നിന്നുള്ള ദൈവത്തിന്റെയും
പാട്ടുകേട്ട്
ഞാനുണര്‍ന്നു.
കറന്‍റ്പോയപ്പോള്‍
ദൈവത്തിന്റെ പാട്ട് നിലക്കുകയും
കിളികളുടെ പാട്ട്
തുടരുകയും ചെയ്തു.
ഇതറിയാവുന്നതുകൊണ്ടാണു
എന്റെ പാട്ടിനു
ഞാന്‍ പൊയ്ക്കൊണ്ടിരിക്കുന്നത്

വെറുതെ രണ്ടു കണ്ണുകള്‍

2008-04-07T23:24:00.000-07:00

എതിരെ വരുന്ന
ആണ്‍കുട്ടികളുടെയെല്ലാം കണ്ണുകള്‍
നിന്‍റെ മുലകളിലായതിനാലാണോ പെണ്‍കുട്ടീ
നിന്‍റെ മുലകള്‍ക്ക്
രണ്ടു മുഴുത്ത കണ്ണുകള്‍?

വെറുതെ രണ്ടു- രണ്ടു കണ്ണുകള്‍

2008-04-07T20:25:00.000-07:00

പാവം പെണ്‍കുട്ടി
അവളുടെ മുഖത്ത് രണ്ടു കണ്ണുകള്‍
ആരും നോക്കാനില്ലാതെ

അവളുടെ മുലകള്‍ക്ക് രണ്ടു കണ്ണുകള്‍
എല്ലാവരും നോക്കുന്നുണ്ടെങ്കിലും
ആരെയും കാണാനാവാതെ

ചരിത്ര വ്യാഖ്യാനം

2008-04-07T11:29:00.000-07:00

കലഹത്തിന്റെ നാളുകളിലൊന്നില്‍
ഭാര്യ പറഞ്ഞു
നിങ്ങള്‍ ലോകത്തില്‍ വെച്ച്
ഏറ്റവും വിഡ്ഢിയും
വിരൂപനും
കാര്യഗൌരവമില്ലാത്തവനുമായ ഭര്‍ത്താവാണെന്ന്
അവള്‍ക്ക് പിണഞ്ഞത്
വെറുമൊരു അബദ്ധം മാത്രമാണെന്ന്.

ഞാന്‍ ഞങ്ങളുടെ പ്രണയ നാളുകളെകുറിച്ച് ഓര്‍ത്തു.
ചരിത്രം വ്യാഖ്യാനിക്കെണ്ടത്
സംഭവങ്ങള്‍ കൊണ്ടല്ല
തിരിച്ചറിവുകള്‍ കൊണ്ടാണ് എന്ന്
എനിക്കും ബോധ്യമായി

ആധിവണ്ടി

2008-04-07T10:21:00.000-07:00

ഇഷ്ടപ്പെടല്‍
ഒരു പെടല്‍ ആണെന്നു
മറ്റാരോ ആണ് പറഞ്ഞത്.
പിന്നെപ്പിന്നെ
കഷ്ടപ്പെടല്‍
ഇടപെടല്‍
വേര്‍പെടല്‍
ഒടുവില്‍
ഒടുവില്‍
ഒടുവില്‍ മാത്രം
ഒറ്റപ്പെടല്‍.
ഒറ്റ പെഡലില്‍
എത്ര വരെ പോകും
ഈ ആധി വണ്ടി ?

സ്നേഹം

2008-04-07T00:11:00.000-07:00

എത്ര പഠിച്ചിട്ടും
ചിന്തിച്ചിട്ടും
നിഘണ്ടുക്കള്‍ പരതിയിട്ടും
നിന്റെ മാത്രം അര്‍ഥം കണ്ടെത്താനായില്ല.
അര്‍ത്ഥമില്ലാത്ത ഒരു വാക്കായതിനാലാണോ
നീ ഇത്രമാത്രം
വിനിമയസാധ്യമായിരിക്കുന്നത്?
അര്‍ത്ഥമില്ലാത്ത ഒരു വാക്കായതിനാലാണോ
നീ എല്ലാവര്ക്കും ഇത്ര പ്രിയപ്പെട്ടതായിരിക്കുന്നത് ?

സ്മരണ

2008-04-06T23:46:00.000-07:00

ഒരിക്കല്‍
വായിച്ചു മടക്കിവെച്ച പുസ്തകം
മറ്റൊരിക്കല്‍ തുറന്നു നോക്കിയപ്പോള്‍
പുസ്തകത്താളുകള്‍ക്കിടയില്‍
ഞാന്‍ കാണാതെ പോയ
ചിത്ര ശലഭത്തിന്റെ
പൊടിഞ്ഞ ചിറകുകള്‍
കേള്‍ക്കാതെപോയ ചിറകടി ഒച്ചകള്‍ ....